Online-a chhiah khawn mipuiin hmang tangkai

Land Revenue & Settlement Department-in lei man leh Zoram chhiah a khawn thinah online-a pek theiha an ti chu chhiah petu mipuiin an hmang tangkai thawkhata an hriat thu an sawi.
Zawhna chhangin Revenue hotute chuan, chhiah hi office-a kal kher ngai loa internet online-a pek theih a ni a, office (District office) a kalte pawh online hmang tho in a sumfaiin thawktuten lo buaipuiin an pe tih an sawi.
Tunah hian Aizawl Municipal huamchhung chauh online-a pek theihin an la kalpui a, Aizawl district pum leh district dangah chuan kalpui a la ni lo. Nakinah chuan online veka pek theih tura la buaipui a nih an beisei thu an sawi a ni.
Chhiah hi kum hmasa lam rate ang tho hman a la ni a, kal dan tlangpuiah chuan kum 5 danah rate hi ennawn thin a nih laiin, tun ami hi kum 2016-a ennawn kha an la ring, tiin, department hotute chuan zawhna an chhang.
Chhiah hi biak in, thlanmual leh ex-servicemen te ah chuan awl tir an ni a. LSC pek thar leh, LSC then sawm a awm ve reng avangin chhiah petu leh a lut zat chu pung ve hret turah an ngai tih an sawi.
Kum 2022- 2023 khan Land Revenue & Settlement Department hian chhiah an khawn atangin Rs. 2076, 78,172 an hmu a. Kum kal mek, 2023- 2024 December thleng khan Rs. 49,450, 266 an hmu tawh a ni.