Online-a Fire NOC lakna siam

In sak dawna Fire & Emergency Services department atanga no objection certificate (NOC) dil ngai thinah an office-a kal kher ngai loin mipui tana awlsam zawkna atan online-a dilna tur portal – www.fsonline.mizoram.gov.in an siam thar a, Ningani khan Home minister K Sapdanga’n a tlangzarh.
Home minister chuan insak dawna NOC dilna, Fire & Emergency Services office-a kal ngai loa, mahni awmhmun atanga online-a a dilna portal siam chu department tan niloin mipui tan a ni a, mipui tan awlsamna siamsakin thil pawimawh leh tangkai tak a ni dawn tiin a sawi.
AMC Regulations 2012 Clause 5 (3)(ix) in a phut angin, Aizawl Municipal huamchhunga high rise building (metre 15 aia sang) sa turte tan leh National Building Code 2016 Part IV (Fire & Life Safety) in ‘building’ tia a tarlante tan Fire & Emergency Services department atangin ‘Fire NOC’ neih tur a ni a. Hetiang in sa turte chuan a dilna hi an in sak dan building plan nen a hmuna kalin an thehlut thin. Chumi hnu ah Fire & Emergency Services hian site inspection a nei a, provisional NOC a pe thin a ni.
Mizoram sawrkar duan angin Fire NOC fee hi, residential building atan square metre khatah Rs. 1.50 (a tam berah Rs. 2000) leh non- residential building atan square metre-ah Rs. 3 (a tam berah Rs. 3000) lak thin a ni. Diltuten in an sak zawhah final NOC dilna an thehlut leh a, department-in kangthelhna hmanrua dah ngai an tarlante an dah leh dah loh an endik hnu ah final NOC hi an pe chauh thin. Portal-ah hian heng hi a hmuna kal ngai loin online in dilna a thehluh theih tawh a ni.
Online portal hi Mizoram Information & Communication Technolgy department kutchhuak a ni.