Opium man tur awm lovah ngai

Khawvel huap pawha ruihhlo hluar opium lakah Mizoram hi a la himah ngaih a ni a, Mizoramah mamawhna a awm lovah ngaih a nih bakah man tur pawh a awm rih lovah ngaih a ni.
Opium lakah Mizoram hi a himah ngaih a ni chungin man tur hi chu a awm ve leh zeuh thin a, vanneihthlak takin tun hnaiah man tur a awm lo nia ngaih a ni.
Mizoramah ruihhlo a hluar tih a ni a, mahse Mizoram Excise & Narcotics (MEN) department-in nikum khan opium hi an man lo. Kuminah pawh an la man lo.
2022 leh 2023-ah khan tlem azawng an man a, 2024 hnuah an la man leh lo. MEN department hian 1995 atangin kum tina ruihhlo an man zat hi an chhinchhiah a, opium an man loh kum hi a tam zawk.
2016-ah khan kg 18.478 an man a, hei hi an man tam ber kum niin, tihtham an man kum awm chhun ti pawhin a sawi theih ang. Hemi kum hian mi pakhat kut atangin tam tham tak an man a ni.
MEN department hotute chuan Mizoram hi khawchhak lam atanga ruihhlo tawlh kawng a nih avangin opium man tur pawh hi a awm ve thin tih an sawi a, mahse an man pawh hi Mizorama mi tur ni lovin hmun danga mi tur a lo ni thin an ti. 2016-a tam tham tak an man pawh kha hmun dang daiha mi tur a lo ni.
An chhinchhiahna enin, 1995-ah a vawi khat nan opium hi an man a, chumi hnuah 2001-ah an man leh. Tun hnaiah chuan 2018, 2019, 2022 leh 2023-ahte an man leh.