Oppn leader lawm lo ten PM Modi hnenah lehkha an thawn

Delhi excise policy case kaihhnawiha Delhi Deputy Chief Minister hlui Manish Sisodia man a nih hnuah Opposition pakuate chuan Prime Minister Narendra Modi hnenah lehkha thawnin ‘Opposition member te lakah central agencies te chu dik lo taka hman khawloh an ni’ tiin an lungawilohna thu an thlen.
Sisodia man chu ‘witch hunt’ tia sawiin ‘democracy atangin autocracy ah kan inthlak danglam ta’ tiin lehkhathawnah chuan ziah lan a ni bawk.
He lehkhathawna hming ziah hnantu zingah – Chief Ministers K. Chandrashekar Rao, Mamata Banerjee, Bhagwant Mann leh Arvind Kejriwal, bakah National Conference’s Farooq Abdullah, Nationalist Congress Party chief Sharad Pawar, Sena’s Uddav Thackeray, Samajwadi Party chief Akhilesh Yadav leh Bihar Deputy Chief Minister Tejashwi Yadav te pawh an tel a ni.
Prime Minister hnena lehkhathawnah chuan, “Hun rei tak witch-hunt kalpui a nih hnuah Manish Sisodia chu Central Bureau of Investigation (CBI) ten finfiahna awm hauh lovin thil fel lo a awm tia sawiin an man a ni,” tia tarlangin, Sisodia puhna te chu “behchhan awm lo leh political conspiracy a ni,” an ti bawk.
February 26 khan CBI te chuan Sisodia chu Delhi a hnawl tawh liquor policy kalpui danah eirukna a awm tiin an man a. March 4 thleng kawl an dilna chu pek niin a hnuah CBI te chuan Sisodia chuan min thawhpui tha lo tiin ni hnih chhung kawl an dil chhunzawm leh a ni.
Opposition leader te chuan Sisodia man a ni chuan khawvelin rinhlelhna a neih – India democratic values te chu tihchakloha awmin authoritarian BJP rorelna hnuaiah a lut mek tih chu nemnghehin a awm an ti bawk a.
Opposition hruaitu rualte chuan Central agencies tena Opposition leader te an man chu a hluar hle tibawkin, “Kum 2014 atang khan opposition leader te chenna in dap thut te, case siamsak leh man te a pung nasa hle a ni. Lalu Prasad Yadav (Rashtriya Janata Dal), Sanjay Raut (Shiv Sena), Azam Khan (Samajwadi Party), Nawab Malik, Anil Deshmukh (NCP), Abhishek Banerjee (TMC) te chu a tuar tawhtu an ni a. Central agencies te hi Centre a rorel lai te tana thawk an nihna rinhlelhna a lian hle a ni. Case tam takah chuan opposition leader te man leh thubuai siamsak hun hi inthlan awn hnaih ni zel bawkin hei hian politics thil taka kaihluh a nihna a tichiang a ni,” tiin Opposition leader te chuan an lehkhathawn ziahah an tarlang a.
“Kum 2014-a i sorkar atangin politician man, thubuai siamsak leh thuzawh ziah te chu a tam ber opposition leader te an ni. Mak tak maiin Opposition politician BJP zawm te thubuai erawh tihkhawmuanin a awm thung,” tiin an ziak bawk.
Entir nana an hman chu Assam Chief Minister Himanta Biswa Sarma niin kum 2014 leh 2015 khan Saradha chit fund scam ah CBI leh ED tena an chhui chian a ni a. “Mahse, Sarma-an BJP a zawm hnuah a case chu kalpui chhunzawmin a awm lo va. Chutiang bawkin TMC leader hlui Suvendu Adhkari leh Mukul Roy te pawh Narada sting operation ah ED leh CBI te chhui an nih laiin West Bengal State a Assembly Election dawna BJP an zawm hnuah an thubuaia te chhuizuiin a awm lo,” tiin lehkhathawnah chuan an ziak lang bawk.
BJP kaihhruai NDA sorkar kum riat chhungin, opposition leader langsar 124 zingah 118 laiin Central Bureau of Investigation an hmachhawn tawh a ni tiin Indian Express chuan a report bawk.
Opposition te chuan central agencies te chetlak dan leh chet hunah zawhna an siam abwk a. Central agencies te chuan ‘an ngaih pawimawh tur an hai’ ti bawkin Hindenburg report a Adani group te stock manipulation leh accounting fraud an kalpui tia sawiah an la ngawi reng an ti bawk a. “Mipui sum tam tak dik lo taka chai kual nia a lan laiin eng vangin nge Central agencies te chhui chiang tura tih an nih loh?” tiin opposition leader te chuan zawhna an siam zui bawk.