Opposition ten seat-sharing ngaihtuah

July chawlhkar hnihnaa Shimla-a inhmuhkhawmna an neih leh hma ngeiin opposition party-te chuan Bihar, Maharashtra, Tamil Nadu leh Jharkhand state angah te seat-sharing formula neih dan tur an duang mek a.
State level tinah inbiakna kalpui tan mek a ni tia sawi a ni a. “Lok Sabha seat 543-ah a theih chuan BJP te paih thla turin common candidate siam chakawm ni mah se, a theih loh a. Kan tih theih chu State hrang hrangah awmze nei taka seat-sharing formula siam a ni,” tiin senior Opposition leader pakhat chuan a sawi a.
Patna meeting neihnaah khan Opposition leader thahnem tak te RJD patriarch Lalu Prasad leh Samajwadi Party president Akhilesh Yadav te ang chuan Congress chu rilru zautak pu turin an ngen a, mahse, Congress-te chuan apawng ataka seat ken ngawt an tum bik lo tia sawi a ni.
Opposition-te chuan Uttar Pradesh ngai pawimawh em emin BJP te paihthlak theihna bera ngaih a ni a. Samajwadi Party, Rashtriya Lok Dal leh Congress te inkara seat insem chu pawimawh tur a ni a. Mahse, SP leader te chuan Congress te chuan seat ngiat chin an neihah a taka thil awm dan leh nihna dik tak an hisap tel tur a ni, an ti.
Seat insemna hi Punjab leh Delhi te ang Congress-Aam Aadmi Party inkar that lohna leh inbeihna nasatna hmunah harsa zual tura ngaih a ni a, hei vang hian nakin lama la chinfel tura dah tia sawi a ni a. Hetih lai hian AAP te chuan Delhi ordinance chungchanga Congress dinna an hriat hma chuan kal thui zui zel ngaihna a awm lo tiin Congress te chu an kar ve mek thung a.
Shimla inhmuhkhawmna neih turah hian opposition party hruaitu lawk te chu an tel kim hle tura ngaih a ni a. Shimla-ah hian Patna-a sawm tel loh party tenau zawk hruaitute pawh sawmin an awm dawn tia sawi niin chung zingah chuan IUML, VCK. All India Forwad Bloc leh RSP te pawh sawi lan zingah an tel a ni.
Opposition party te chuan BJP te paihthlak an nih theih nan common campaign neih dan tur te an duang fel tura sawi a ni a. “Kum 2024 election atana Opposition unity hi electoral alliance ngawt a ni lo, Oppostion party te echo-chamber piahlam khawih a ni,” tiin Congress leader chuan a sawi.
Hun a la awm bawk avangin opposition te hian common protest neih dan tur duang dawnin unemployment rate sang te, Centre in caste census a neih duh loh te leh federalism beihna tawh chungchang te chu ngaih pawimawhah an nei dawn tia sawi a ni bawk.