Organic movement-in rah tha
a chhuah – Agriculture minister
Mizoram sawrkarin organic movement a kalpui chuan rah tha a chhuah mek tih Agriculture minister C Lalrinsanga chuan a sawi.
Inrinnia Ngopa Saphmuahna Muala Zaupui Organic Farmers Producer Company hman tur Pack House a hawnnaah Agriculture minister chuan sawrkarin harsatna tam tak karah tha thlah loin intodelhna kawng a zawh zel tih sawiin, chu kawngah chuan MOVCD hnuaia organic movement chu theihtawpa kalpui a ni a; Zaupui FPC Ngopa-in nasa taka organic thlai thar kawnga hma an la chu lawmawm a tih thu a sawi.
“Organic movement kan kalpui hian rah tha a chhuah mek a, tunhnai maiah pawh USA thlengin kan organic hmarcha thar kan hralh thei ta a. Organic thlai hi a hrisel piahlamah a market a tha a, organic farming lama kan hmalakna hi na zawka kalpui turin hmabak thui tak kan la nei a ni,” a ti.
He Pack House-ah hian khawl chi hrang hrang – aieng, chhawhchhi, antam, hmarcha, vaimim, nihawichi leh sawhthing herna khawl bun a ni a. Heng khawl hi MOVCD-NER hnuaia Zaupui Organic FPC-in a lei niin, khawl hi pulvarizer (her dipna khawl) leh 10 Hp oil expeller te an ni.
Zaupui Organic FPC hi MOVCD-NER hnuaia din niin, farmer 934 an awm a, khaw 18-ah hma la in an thlai pui ber chu hmarcha a ni.
Organic movement-in rah tha a chhuah – Agriculture minister
Get real time updates directly on you device, subscribe now.
Prev Post