Oscar-ah Best International Film nomination-ah Hindi film pahnih lang thei dawn em?

Oscar 2025 a best international film category-a nominate ni thei tura film theh luh zingah Hindi film pahnih a tel a, India atangin official entry atan Kiran Rao film siam ‘Laapataa Ladies’ thlan a ni a, Britain-in official entry atan Hindi film tho ‘Santosh’ an thlang ve bawk. Ram hrang hrang atanga official entry te hi Oscar nomination-ah a lang vek dawn tihna a la ni lova, Academy lamain lo thlifim lehin, nomination a lang thei tur an thlang leh dawn a ni.
India atanga official entry thlan turah film 29 theh luh a ni a, chung zingah chuan Bollywood film hriathlawh tak ‘Animal’ bakah Malayalam National Award winner ‘Aattam’ leh Cannes Film Festival-a award dawng thei ‘All We Imagine As Light’ te pawh a tel a, Tamil film ‘Maharaja,’ Telegu film, kumina Indian film lar berte zing ami ‘Kalki 2898 AD’ leh ‘Hanu-Man’ leh Hindi film dang ‘Swatantraya Veer Savarkar,’ leh ‘Article 370’ te pawh a tel.
India atanga official entry tur hi a thlangtu member 13 awmna select committee a awm a, chuta an hotu ber chu Assamese director Jahnu Barua a ni a, anni hian lungrual takin ‘Laapataa Ladies’ hi an thlang ta a ni. He film siamtu Kiran Rao hi Bollywood star Aamir Khan-a nupui niin, he film hi an nupaa an produce a ni nghe nghe.
Laapataa Ladies hi Nitanshi Goel, Pratibha Ranta, Sparsh Shrivastava, Chhaya Kadam leh Ravi Kishan te channa niin, nupa tuak thar pahnih te an rel chuanna a an nupui an inthleng palh dan vel tarlanna a ni. He film hi 48th Toronto International Film Festival-ah chhuah a ni a, March thla khan cinema hall-ah tihchhuah niin, Melbourne-a Indian Film Festival-ah pawh Best Film (Critics’ Choice) a dawng tawh bawk.
UK official entry ‘Santosh’ hi London a cheng Sandhya Suri film siam a ni a, police thriller niin, Uttar Pradesh a thil thleng anga chan niin, 77th Cannes Film Festival-ah pawh chhuah a ni. He film-ah hian Hindi tawng an hmang a, police nupui pakhat, a pasalin a thihsan hnua a police constable a tang zui ve ta-in hmeichhe pakhat tual thihna chhuinaa a buai zui dan vel tarlanna a ni.
Best International Film category-a lang thei tur hian film chu minute 40 aia tawi lo a nih a ngai a, US pawnlama produce a ni ngei tur a ni a, film-a an tawng hman pawh sap tawng ni lo (non-English language) a nih a ngai a, cinema hall-ah kar khat tal a chhuak ngei tur a ni bawk.
Indian film hi Oscar-ah an lang mawh hle a, final nomination thleng thei hi film pathum chiah a la awm a, 1957-ah ‘Mother India’ nominate a ni a, 1988-ah ‘Salaam Bombay’ langin, 2001-ah ‘Lagaan’ a lang bawk. India-a film siam zinga Oscar dawng thei awm chhun chu Danny Boyle film siam ‘Slumdog Millionaire’ kha a ni a, mahse, kha film hi Indian film siamtute direct a ni lo.