Overbridge-ah i kal hram ang u

K. Hmingthankaia
Khi thupui hmang khian kum 7 vel kaltaah khan ka lo ziak tawh. Chutah chuan, ‘Kei pawh Cervic spine chhe tawh, hmun sang leh hmawra awm thei lo, luhai zel ka ni chungin, a sir vuanin ka kal hram hram thin’ ka ti nghe nghe. Tun thleng hian Bungkawna ami-ah saw chuan ka la kal deuh ziah. Buai taka kawng kan tumte hi ka en ru deuh thina, ka kalna lama kal tum ve tho te leh, overbridge atanga an kal tumna pawh ve thei tho te an ni thin.
Kawng pengthuam kanna tur awm se tiin mipui kan phun a. Sawrkarin hmun thenkhatah min siamsak ta a, mahse, overbridge-a kal zak tlat, kal hreh tlat kan la tam em em a ni. Overbridge awm rengna hmunah pawh, hlau chung chung leh rem leh rem lovin, phili deuha motor tlan lai leh traffic police tibuai zawnga kawng kan tum kan la tam em em a ni. Hetia kawng kan kan chhunga motor kan tihdin hian, motor inzui tlan tluang lai, traffic flow kan tibuai a, chu chuan thui tak nghawng a nei a, thil pawi tak pawh a thleng thei a ni. Chuvangin, overbridge awmnaah chuan, keimahni leh midang him nan leh, driver leh police tibuai lo zawngin, overbridge-ah i kal hram hram ang u. Kan kal tumna kawk lo deuh pawh nise, let leh hret pawh inhuamin, kan that tlanna turah chuan khua leh tui tha nih hi i hreh lo ang u. Overbridge kal hreh vang hian tawhsual pawi zawk kan tawk thei reng bawk a ni
Sawrkar hian kawng chhawng min siam thei lo a nih pawhin, overbridge tal hi heng hmun hrang hrangah hian min siamsak turin, tun sawrkar, ZPM hi tlangnel tak leh ngenngawl takin ka phut a ni.
Pawimawh em em Bawngkawn pengthuam pahnihah. Chaltlang Dawrkawnah. Chandmari kawn leh HBC pengah. Zarkawtah. Israel point-ah. Thanna peng leh Hospital pengah. Temple Square-ah. Raj Bhavan north leh south gate bulah. Sikulpuikawnah. Mission veng Biak in bulah. Mission veng Bazarah. Kulikawnahte.
Tin, Bazar Bungkawn ami hi Saron veng lam panna siam belh ni se. Treasury pengthuam chhak leh thlang hi inzawm veka siam ni bawk se. Khing hmunte khi mipui hlauthawng tak leh mangang phili-a kan awmna hmun a ni.
Overbridge siam hian thatna tam tak a nei. Design nalh tak leh uluk taka siam chuan khawpui ti mawitu a ni a. Miin hahchawlh nante, phone khawih nante leh mei zuk nante an hmang thin bawk.
Nakinah siam a la tul dawn tho tho a. Khawpui khawsak phung a tawt lehzual hma leh siam a buaithlak hma, tuna siam a la awlsam deuh lai hian, tun ZPM sawrkar hian, in sawrkar thil tih hriat reng nan leh hming chher nan, in land mark pakhat atan han siam vek teh u. Mipuite harsatna leh manganna atanga thlamuanna leh awlsamna siamsak chu sawrkar awm chhan a ni si a.