MC. Lalthianghlima
-- Advertisement --
Kohhran huang chhûng mai ni lo, kan ram leh hnam damna tur atâna kan damdawi ei duh zawng chauh ni lo kan ngeih tur leh kan dampui tur a nih dawn phawt chuan damdawi khâ leh lem har tak pawh min chawh ngam mi tlêm tê zinga pakhat chu Revd. Dr. Chuauthuama kha a ni ti ila, thu uar kan ni hauh lovang. A hun laia thil thlengte kha ngun takin a thlira, kil hrang hrang atanga chîk taka a thlir hnu ah a mimal ngaihdân chu venthawn leh tîmna nei map lovin huaisen takin a rawn au chhuahpui mai thin kha a nia, a haw duh tân chuan huat mai pawh a awl hle thin âwm e, mahse zamna nei hauh lovin he ram thatna tur hi a lo âu chhuahpui thin a nih kha.
January ni 4. 2025 (Inrinni) ah khan Chuauthuama Memorial Committee (CMC) chuan Pu Chuaua thih champha kum 1-na pualin Ramhlun Vengchhak Kohhran Hall ah “Revd. Dr. Chuauthuama Memorial Lecture” programme an buatsaiha, keipawh a bîktaka sawmna ka hmuh angin ka va tel thei a, a hlawk thlak hlein ka hria. He hun ah hian mi pahnih Upa R. Lallianzuala leh Pu K. Remruatfela-te’n thupui sawina (Paper present) an nei a. “Mizo tawng tihhmasawn – R. Lallianzuala” leh “Chîk taka thil thlir kawnga hma hruaitu Revd. Dr. Chuauthuama -K. Remruatfela” te kan zirin, sawihona hun tha tak kan nei thei nghe nghe a ni. Hun lokal leh zêl turah CMC hian hetiang hun hi buatsaih fo an la tum bawka, a mah Pu Chuaua awm tawhlo mahse CMC hian kan ram tân hna tha an la thawk zêl turah pawh ngai ila, an hmalakna hian kan ram tân hlâwkna tam tak a la paw chhuak zêl turah ngai teh ang.
Pu Chuaua kha Kohhran thlavang hauh na tak a nih rualin, diklo ni a a hriat erawh a ruh lang râwta na taka sawisêl ngam a ni bawk, hetiang mi hi hmangaihtu dik an ni châwk. Mi tam takte hi chuan venthawn leh tlâktlum loh kan hlauh luatah diklo pawh kan bitum ngam lova, sawisêla zilhhau aiin diklo tih hriat reng pawh thup mâwi dan kan zawng hram hram ni hian a hriata, hei hi damdawi tha a ni lova, nachhawkna pawh a tling zo lova, dik lohna vulh lenna mai a ni zawk. Pu Chuaua’n ram a vei zia leh ram tâna thil tha leh dik a duh zia pawh tlâng hriat a ni. Ram inrelbâwlna chungchangah pawh kan kal dan dik tâwklo ni a a hriat ah chuan a thling baw hawkin a sawi mai thin a, mite huat nih pawh pawisa lova dik leh diklo langsâr taka thliar ngam mi tlêmte zinga pakhat chu Pu Chuaua kha a ni chiang khawp mai. “Thluaka sum lût” tih tawngkam rawn phawrh chhuak lâr êm êmtu pawh kha Pu Chuaua hi niin ka hria.
Mahni hamthatna tur atâna sorkar miliante bathlâra tei zek zek ngailo leh mite tih lâwm tum luat avanga mi tlawn huam ngailo, diklo tih hriat reng thup mâwi mai mailo a nih vangte leh a chhe lai siamtha tura huaisen taka âu chhuak thin mi a nih avang khan kei chuan Pu Chuaua kha “Mizo Nehemia” ka ti mai.
Tunlaia kan rama issue hrang hrang kan hmachhawn mêkahte hian Pu Chuaua kha la dam ni se, a ngaihdan leh a thu leh hla hriat a châkawm thin ngawt mai. Vanglaini chanchinbu ah “Revd. Chuauthuama huang” ah rawn ziak leh nghek sela tha tur a nia, nimahsela Mihringte hian kan nunna thuah hian thû kan neilo lulai lutuk deuhva, mihringte ngaiha hunlo taka min chawlh san ta mai hi chu a ngaihawm thin vuang vuang teh e.
He khawvêlah a taksa chu nungdamin awm tawhlo mahsela, a damlaia a thiltih that leh a thu leh hlate chu Zoram khawvêl ah hian a dai ngai tawhlo ang.
“Ka ngawih avanga ram leh hnamin a tawrh ai chuan, ka âu chhuah avangin keima’n ka tuar zawk mai ang” – John Pymad.