Own goal hmanga chak Barcelona

Own goal hmanga chak Barcelona
Spanish La Liga hmahruaitu Barcelona chuan an hmahruaina sawhnghet tur leh an tlawm loh kal tluang lai chhunzawm turin Inrinni zanah hnehna an chang leh a, mualneitu Leganes laka an chakna goal awmchhun erawh ‘own goal’ niin, an striker goal thun thei Robert Lewandowski pawhin Barcelona goal 100 thun tlin a tumna kawngah match dang a nghah leh rih a ngai dawn.
Mipui 12,530 punkhawmna Municipal de Butarque stadium-a inkhelah Catalan team hian an khelh that theih ber boruak an pha lo hle a, tlakhniam pumpelh tura thih thaa tan khawh mek CD Leganes lakah goal thun an harsat tluan a; second half tir lam minute 48-a home defender Jorge Saenz chesual chuan an lam goal-ah Raphinha ‘cross’ a tilut palh a, Saenz hian a hnunga lo changtu Lewandowski hna a thawhsak a, chu chu Nou Camp club hian sikhat faia chakna’n an hmang ta a ni.
Point hniha a him chin thleng pha lo, tlakhniam theihna hmun atanga point hnih leka la him hram hram Leganes hian nikum December thla khan Barca hi an lo hneh tawh a, Inrinni zanah pawh first half chhungin goal thun theihna hun remchang an nei tha zawk a, Adria Altimira goal tur chu Barcelona keeper Wojciech Szczesny chuan tha zetin a dansak a, Dani Raba pawhin tum hnih ngawt a hun tha neih a bawhpelh ve bawk.
Hansi Flick-a team-te pawh hian a hnu lamah chance an nei chho ve ta zauh zauh a, Fermin Lopez chuan penalty area chhung atangin goal pawnah a chhuih chhuak a; chutih laiin Leganes right winger Raba pawhin goal a khung ngei a, mahse, offside vangin hnawl a ni a; Leganes substitute Diego Garcia pawhin goal thun theihna hun remchang zet nei chungin a hlawhtling zo ta bik lo.
Karliamta Nilaini zan Champions League quarter-final first leg match-ah Barca hian sili faiin Bundesliga club lian Borussia Dortmund an sawp a, kha mi tuma lut hmasa zingah khan Leganes lakah player pahnih chiah Flick hian a thlak a, anmahni pualin goal khung zo ta chiah lo mah se inelna hrang hrangah belhkhawma game riat chhung an chak zawnna an lawm thei ta tho a; La Liga bikah match 12 chhung an tlawm lo zawn ta bawk.
Goal thun lamah harsatna tawk mah se goal chhuah kawngah erawh Barca tlarhnung a la phui chhunzawm zel thung.
First half chhunga an left-back huhang nei lian Alejandro Balde thlak ngai khawpa a inhliam erawh Catalan team tan hlohna a tling awm e.
Poland striker Lewandowski chuan Barcelona goal thun tling turin goal khat bak a mamawh tawh lo a, mahse, Leganes lakah a century siamna tur a puitlin zo lo leh rih a, Raphinha ball pek tuihnai zet chu goal pawnah a thawnchhuak hlauh a ni.
Leganes centre-back Saenz khan ‘own goal’ vawihnih a tilut teuh hle a, a ball khakper atangin a chesual leh teuh hle a, a him hram a ni!
Nizan result tarlan hman lohah league table-a pahnihna luahtu Real Madrid chuan talbuai ve tho Alaves an luhkhung a, an result hriat hma thlengin an chung chiaha hmahruaitu Barcelona lakah Real hi point sarih laiin an hniam hman tawh a ni.
Inelna hrang hrangah belhkhawma game 24 chhung tlawm lo tluang mek Hansi Flick-a team hian point 70 nei tawhin, Real Madrid-in he thu buatsaih lai thleng hian point63 an hum ve tawh.
Naktuk, Thawhlehni zan hian Champions League last-eight second-leg tie zp fel law law turin Barcelona hian Germany-ah Dortmund an luhkhung dawn a; kartawp Inrinni La Liga lamah Celta Vigo an mikhual thung ang.
Inrinni zana an chak hram hnuah Barca boss Flick chuan inkhel harsa tak ni mah se hnehna an chang leh thei hram kha a pawimawh tih sawi chungin tunhnai chawlhkar liamta hnuhnung leh thla tlemte liamta chhunga a naute khawsak danin a tilawm hle tih a sawi a; Leganes game-ah defence leh attack lama an dinhmun a duhawm loh thu sawi chungin point thum an hmu kha a pawimawh ber niin a sawi.
Tlahniam thei dinhmuna la ding chhunzawm zel Leganes khan point 28 nei ve tawhin, a mawngphah chung chiah an luah chhunzawm zel a, point hnihin safety zone an chuangchhuak pha lo chiah chiah.