Mipuite tan rawn Zemabawk BC an liam ta!! MSL X Finals – Zarkawt BCA vs Khatla TBL

Mipuite tan rawn Zemabawk BC an liam ta!!
MSL X Finals – Zarkawt BCA vs Khatla TBL
April ni 12 (Inrinni) zan khan R. Dengthuama Indoor Stadium-ah mipui an fuankhawm khat hneh hle a, MSL X a inkhel hmuhnawm ber phochhuahin a awm zui – mipuite tan rawn Zemabawk BC chuan hun pangaia hnehna chang tura hun rangkachak an bawh pelh zet hnuah, hun pek belh (over time) minute 5 khel lehin, an kutah hnehna ball a awm zui leh cheu – an thlauh nawn!
Team tlo leh fei, Khatla TBL in MSL X nomawi chawi ngei tuma zin kawng an zawh mekah mitthi tho leh ang an ni – kai thar Zemabawk BC lakah an chesual nawn teuh hle. A tawpah chuan Mizoram basketball chanchina team ropui ber te zinga mi leh ngialnghet ber pakhat, tantu leh tawiawmtu nei tha ber pawl, Khatla TBL in Zemabawk BC lakah 109 -107 in vanneihna nen MSL X finals an inhlangkai.
Best of three series hmanga inbeihna hautak leh hmuhnawm, finals hmachhawn tur hi Zarkawt BCA leh Khatla TBL an ni ta – a tawpah chuan he team pahnih hian nomawi inchuhin club zawng zawngte chungah an inngur leh ta chhar chhar e!
Khatla TBL vs Zemabawk BC,
semi finals 2 game 3 chu!
Bul tan nan khawi lai ber pawh kha thurchhuak ila, a ngaihnawmin a hmuhnawm vek. Over time a Zemabawk BC Mizo tlangval hlang huaisen zia kha sawi ta ila ziah sen chi pawh zu ni suh!
Chak thei dinhmun tha taka an din lai, hun tawpnana second 35 lek a awm khan – ‘nervous Nitish Beniwal-an’ freethrow pahnih an hlah tlat mai kha a va demawmin a va che Bollywood – a changtupa nau nih thlak tak!
Perkins Jr. (28 pts) leh captain cool Rozama (29 pts) te’n huaisen takin mipui phurna belhchhah tur leh team tana an ruh sawhtliak lo chauha an tluk chilh pawp pawp a, team chhah tha zawk Khatla TBL an chelh tang tang thei a nih kha!
Rinawma’n point 14 hlu bik neiin, 3 pts tum li ngawt a neih te kha a va tangkai mai mai tak.
Rinzuala (18 pts) leh Lianmawia (8 pts)-te’n an thawhhlawk takzet bawk.
Rozama leh Perkins Jr. an dan beh apiangin Mizo tlangval rin hlawh tawk lo thinte’n chhanna an rawn pe thin – hnam dang player lakluh kawngah Zemabawk BC hi an fimkhur zual tawh ngawtin a rinawm.
Mi pakhat, chatuan ram min pan san ta, amah Khatla TBL banpui Pu Tluangtea rauthla khan kha inkhel kha a uap ngeiin a rinawm – Khatla TBL khan angel thla inkhawng puihna an dawng chiang mai.
Khel chhe hran lo mah se, hun pawimawhah |hazuala (33 pts) a hero thei lo va, a shooting a hlah tluk tluk. Rookie Emmanuel-a (13 pts) khel tha tawk lo bawk mah se a defense erawh a rintlak zual ta fu.
Lsa (11 pts) hi mamawh hunah a rinngam zia a lang nawn bawk.
Heng karah hian James (42 pts) mawlh kha a ni, a team-mate tlan hlei thei lo tul lova foul nei chhen Y. Singh dem kai tur a chhanchhuak.
MSL X kan han chuankai takah chuan tualchhung tlangvalte’n inkhel an thunun ta.
Zarkawt BCA 90-63 Chanmari BC
Semi finals tho, Zirtawpni zana khelhah veng inthenawm mah ni se Zarkawtin point 27 zetin Chanmari an sawp.
He inkhelah hian kut hmui (hot hands) Tamil Nadu kristian tlangval, The Silent Shooter – Justin Gnanaraj (23 pts) chuan minute 13:28 chhung lekin 3 pts vawi 6 a lut hman a – inkhel inhnehtawk tawk tura beiseiah thawh chhuah lehna tur awm lovin Chanmari BC chak inrinna duhthusam a ti tawp!
Chanmari BC hian MSL nomawi tum nga chawi tawh hi league round lamah barakhaihin hneh mah se, semi finals-ah erawh an tan Zarkawt BCA hi hneh theih an ni lo – an inthlau hret!
Semi finals player of the match
Player of the match hi tualchhung player pathumin match nga khelh atangin an la tawh:-
Lalrina Renthlei – 22
|hazuala – 23
Rozama – 1