Pacquiao leh legend dangte kirleh chhan hi engnge?

Pacquiao leh legend dangte kirleh chhan hi engnge?
Manny Pacquiao chauh pawh a ni lo, boxer hming hraw ber berte pawh boxing inelna an chawlhsan vang vang hnua hruihrual chhunga kirleh ta hi sawi tur an awm nawk reng a, hei hi engnge a chhan ni thei awm chhuiho dawn teh ang.
Tarlan tawh angin, karliamta Inrinni khan kum li dawn boxing a chawlhsan hnua inhnek hmachhawn leh Filipino kum 46 mi chuan boxing khawpui Las Vegas-ah welterweight champion upa ber nihna record a lo siam tawh kha a khum zo ta lo a, a tumpui Mario Barrios nen inhnehtawkin, a hnek leh tur chungchangah zawhna a piang nghal a, Floyd Mayweather nena ‘rematch’ hial sawirik a nih zui tak avangin Pacquiao ‘comeback’ hi a zuihral mai dawn lo niinm a lang!
Boxing-a all-time great an tih zinga lang pha Pacquiao pawh hi boxing chhawrtu langsar zingah telin, sum leh hmingthanna bakah an ram sawrkara thuneihna sang tak nei turin kum 2010 khan politik a luhchilh a, Sarangani bial atanga senator ni turin thlantlin a ni.
A hmingpum Emmanuel Dapidran Pacquiao Sr. hi Philippines ramah kum 2016 atanga 2022 chhung senator a ni a, inthlan hnuhnung berah tling zo ta lo mah se infiammi hlawhtling a nihna bakah politician leh businessman hlawhtling a ni tawh a, professional boxer ni tur leh ran hruaitu ni turin kirleh tawh lo pawh ni se a ei khawp chu khawlkhawm tawh awm taka ngaih a nih laiin a hmangaih hmasaber boxing-ah a kirleh a.
Hminglema ‘PacMan’ an tih ngei mai chuan boxing khawvel a chiah chho leh tan mek a, hneh loh nei loa chawl ta Mayweather meuh pawh a chawlh tawhna atangin a hnukkir dawn em tih chu boxing khawvela zawhna lian ber a ni mek!
International Boxing Hall of Fame-a ziahluh tawh boxing-a kirleh an awm zen zen loh laiin boxer ropui bikte an chhinchhiahnaa a hming ziahluh a nih atanga thla khat pawh a liam hmain Filipino hi chuan boxing fans tan sei zawng inang hruihrual pali thlunzawm chhungah hmuhnawm a entir chho leh dawn a; Inrinnia Barrios a hmachhawn hma lawk khan International Boxing Hall of Fame broadcaster Jim Lampley chuan Reuters hnenah beisei a phak tawh a rin loh thu a sawi!
Lampley chuan, “Fighter awmze nei leh hnekchhuak hlawhtling a lo ni tawh ngei mai a, tuntum erawh hi chuan inhnek awmze nei tak min hmuhtir zo tawh ngut ang emaw chu? Ka ring lo.
“Kum 46 mi a ni tawh a, kum li ngawt hruihrual atangin a kalbo tawh a, ka sawi belh zel dawn em?” tiin PacMan kirleh laka beisei a neihsan loh thu a chhak chhuak!
An han inhnek ta a, amah aia kum 16 ngawta naupang zawk lakah Pacquiao khan huaisenna leh tumruhna a put thin ang pangngai bawk kha a lantir leh nghal chat a; upper cut tuihnai tak tak a chhuah leh a; inhnek tawp lamah Barrios khan a hrohrang a rawn tina ta deuh tih lohah chuan Pacquia style hmuhnawm leh mi tiphur thei zet kha Las Vegas tual laiah boxing fans a chhawpchhuaksak leh!
A kumte a lo tam ve ta bawk nen tunhma anga inhnek awmze nei tham a phochhuah beisei tawh lo pawl an awm mek laiin Inrinni bout zawh khan amah bawrtu chanchinbumite hnenah Pacquiao chuan, “Lo buai reng reng suh u. PacMan is back. He zinkawng hi tawpsan mai loin kan chhunzawm zel ang,” tiin hruihruala a kirlehna fight-ah hnehna chang nghal lo mah se tawpsan leh nghal a tum loh thuin boxing fans a thlamuan!
Tarlan tawh angin, Pacquiao bakah hian boxer ropui tak tak pawh an chawlh zet tawh hnuin ring-ah an kirleh fo a, chu’ng zingah chuan nikum November thla maia kir heavyweight champion hlui Mike Tyson kha a langsar ber pawl niin, kum 58 ni tawh chung khan la thalai zawk Jake Paul a hmachhawn a; mahse, kha inhnek kha chu inhnek lem lem ang deuha ngaih a ni!
Kan sawi tum ber chu – engvanginnge boxing legend tling pha tawh meuhte hi hruihruala an kirleh thin tih kha a ni a; a tir lama a hming kan lam rik International Boxing Hall of Fame broadcaster Jim Lampley an tih khan boxer ropui chawl tawhte kirleh chhan lian tak pakhat chu an vanglai chuai tawh mah se mite sawi leh ngaihven an nih thinna boruak kha an ngai a, an takin eng chawi tawh lo mah se hruihrual chhunga kirleh turin thutlukna an siam leh mai thin niin a sawi!
Lampley sawi danin, fighter ropui ni thin, a chawlh hnua vawi hnih ngawt ring chhunga kirleh Sugar Ray Leonard pawh kha chutiang deuh chiah chuan boxing khawvel atanga kalbo kha a ngaingam lo tih a zawhna eng atangin a hriat theih!
Lampley chuan, “A chawlhsan hlen tak tak theih loh chhan kha amahin a hrechiang ber a; boxing huang chhunga phurna leh tawnhriat zozaite kha an bansan tak tak thei lo a, an kirleh chhan hi chu addiction vang a ni ber,” a ti!
Eng infiamna huangah mai pawh hian level sang ber hi chuan chona a keng tel a, tah chuan kum bithliah hian nghawng a nei vek a, a bik takin, boxing-ah hian lu lam a len ber avangin kum upa zawk leh tluak upa zel tan lu lam hliam neihna ‘chance’ a sang bik niin nikhaw hre loa tlukna lam buaipuitu Concussion Legacy Foundation an tiha medical director Robert Cantu chuan a sawi.
Kum upa tawh chunga boxing luhchilh tha lehte zingah lar nawn leh an awm fo a, hlawh tha tak dawng leh theite hial an awm a, mahse, chuti ang mite tan chuan thluak lam hliam theihna ‘risk’ a sang zawk tih doctor hian sawi mah se lar leh mite ngaihven nih hlawhna lo addick laklawh tawh tan chuan kirleh mai hi a awl thin ni berin a lang!