Pahalgam beih hnuah mi 500 vel thu zawt tawh

Pahalgam beih hnuah mi 500 vel thu zawt tawh
Kar kal ta Thawhlehnia mi firfiakten Jammu & Kashmir-a Pahalgam-a mi 26 an thahna an chhuina kal zelah Indian venhim hna thawktute chuan mi 500 vel thu an zawt fiah tawh.
Anni bakah hian a beitute man chhuah ngei tumin a zawn hna ngawrh takin an thawk a, chenna in 1,000 vel leh ramngaw zau tak an dap tawh niin tual chhung police hotuin a sawi niin news agency Reuters chuan a tar lang.
Pahalgam bul, Baisaran-a mi sualte chetna avang hian ram India leh Pakistan inkar chu a chhe hle zel bawk.
Ramriah pawh inkahna a awm zeuh zeuh va, zan li chhung silai a puak tawh a. Indian sipaite chuan ralthuam tenau hmangin Pakistan Army post atangin Pathianni zan lai khan kah an ni tih an sawi.
Pakistani sipaite chuan ramria silai puak chungchang hi engmah an la sawi ve lo va, thi leh hliam pawh an awm hriat a ni lo bawk.
Muslim tamna, India awp chin Kashmir-a Pahalgam-a khualzinte tlawh thin hmuna thil thleng hi kum 25 chhung vela helai hmuna civil mite beihna lian ber a tling.
Venhim hna thawktu leh dam chhuakte chuan a beitu mipate hian an hming an zawt a, Hindu bitumin hnai tak atangin an kap hlawm tih an sawi.
He thil thleng hian India a tithinrim hle a, New Delhi chuan Pakistan-in puiin Kashmir-ah hian ‘ramri pela firfiaka chetna’ thlawpah a puh a. Islamabad erawh chuan inrawlhna an nei loh thu leh tan bik nei lo (neutral)-a chhui an duh tih a sawi tawh.
Beihna an tawh hnuah India chuan beihpui thlakin a titu nia an hriat mi pathum an hriat tawh zinga pahnih chu Pakistani an ni tih a puang.
Ram pahnihte innghirnghona kal zelah India chuan Indus Waters Treaty an neih dun chu a titawp lailawk a, Pakistan nena khawmuala an inkalpawhna a khar a. Islamabad pawhin a chung boruak chu Indian airline-te thlawh a phal lo bawk.
India-a venhim hna thawktute chuan ram chhung hmun hrang hrangah nunchan an zir nghal a, thenkhat hi chu tih dan pangngai renga drill an nih thu defence thuneituten an sawi.
Pahalgam beihna thlentua puh, Kashmir Resistance, The Resistance Front tia sawi bawkte chuan Pathianni khan social media-ah he thilah hian an inrawlh loh thu an puang.
An pawl hian a hma khan an tihah an lo chhal tawh a; mahse, thu thar an neihah hian kha thil kha cyberattack avanga khatianga phuahchawp kha niin an sawi a, Indian intelligent-te tihah an puh bawk.