Pakhatna a ni tih lo-ah a hria

Kar hmasa Zirtawpni khan MBSE buatsaih
HSSLC exam result a chhuak a, arts stream-a pakhatna khan lovah, a feh laiin pakhatna a ni tih kha a hria. A tirah phei chuan a awih lo!
Arts-a pakhatna Rodinpuia Ralte hi result chhuah ni khan a nu nen lovah an feh a, lovah hian signal a that loh avangin result pawh a hre har. A thianpain result bu PDF copy a thawn a, internet a chak loh avangin a hawng thei lo. A thianpa chuan a call ta a, mahse pakhatna a ni tih a hrilh pawhin a awih lo. Chumi hnuah DDK lamin an bia a, interview an duh avangin, chutah chuan a awih ta chauh a ni.
“Pakhatna nih ka beisei lo a, top 10 pawh ka beisei lo. Kan beisei phak loh lutuk a nih avangin a tirah pawh ka awih lo a,” a ti.
Result a chhuak dawn tih hre chungin a feh a, Inrinni bazar-a zawrh tur chawhmeh lain an nufain an feh. Zirtawpni hi a tuk bazar-a zawrh tur laa an feh ni a ni reng reng a, chuvangin result a chhuak dawn tih an hre chung pawhin feh a ngai.
“Result a chhuah dawn avangin ka rilru chu a kam ve deuh a, ni dang ang chu ka ni lo. Mahse feh a ngai a, ka feh a ni mai,” a ti a, zing dar 3 velah a nu nen an chhuak a, kharchhawng pek tur leh anmahni zawrh tur chawhmeh, khanghu leh phuihnam an lak thu a sawi.
“Ka tan feh khan thil mak a ni lo a, thil pangngai a ni,” a ti a, sikul chawlh chhunga a feh thin thu, lo-a a feh bakah hmun dangah antam huan an neih thu te, antam huan hi an thlawh zawh hlim a nih thu te a sawi.
“Hun awl kan nei a, chutiangah chuan a theih ang ang kan thawk ve tur a ni a, chhungte puih an ngai a, ka feh ve thin,” a ti a, “Ka thiante pawhin a rem rem an thawk a, keiniho tan hnathawh hi thil mak a ni lo,” a ti. Hlimen veng an ni a, “Hlimenah chuan thalaiin hna an thawk vek ang, hnathawh hi kan zak lo a, thalai hian a rem rem kan thawk,” a ti bawk.
A feh thu pawh hi han sawi hluai tur chi-ah a ngai lo a, chanchinbu-a chhuah chi-ah pawh a ngai lo; “Thil pangngai alawm, thil mak a ni lo,” a ti.
Pakhatna a ni hi Pathian zar, a nu leh pate leh an zirtirtute zar a ni a ti a, “Home Mission School-ah lut lo ila hetiang ka ni pha lo ang,” tiin an sikul a fak.
Rodinpuia hian phone a nei a, internet pawh a khawih thin. Mahse hei hian a lehkhazir a tibuai lo.
“Phone hi ka nei a, ka khawih thin ngei a, mahse zirlai tibuai khawpin ka khawih lo,” a ti a, a nu leh pain phone chungchangah an khuahkhirh hran loh thu leh amah a inven theih thu te a sawi.
“Phone hi ka nei a, thiante nena inbiak nan ka hmang a, youtube te pawh ka en thin a. Lehkha ka zir dawn chuan ka dah mai a, min tibuai lo,” a ti.