Pakistan-ah chiang la awm lo

Pakistan chuan inthlanpui result puan a nih hnu ni li liamah pawh tu nge sorkar siam dawn tih a la hre thei lo va. Prime Minister hlui Imran Khan lung in a khunga a party Pakistan Tehreek-e-Insaf (PTI) independent candidate te chu mipui ten an duh zia lantirin National Assembly seat 93 lai an la a, party zinga seat la hnem ber an ni. Mahse, simple majority nei thei turin seat 169 hmuh ngai thung a ni.
PM hlui tho Nawaz Sharif kaihhruai Pakistan Muslim League Nawaz (PML-N) te chuan seat 75 la in pahnihna an ni thung a. Sharif party te hi Pakistan a thiltithei em em sipai tena an thlawp niin chak tura ngaihsa zawk an ni a, mahse, rin angin thil a kal ta lo a ni.
Pakistan People’s Party (PPP) Bilawal Bhutto Zardari kaihhruai chu pathumna niin seat 54 an la thung a.
Constitution chuan political party te chuan inthlan atanga karthum chhung 29 February hma in sorkar an siam tur a ni a ti a.
National Assembly ah seat 336 awmin chuta tanga 266 chu inchuh a ni a, 70 chu reserved seat niin 60 chu hmeichhia te tan niin 10 chu non-Muslim te tana dah a ni a, heng reserved seat te hi chu assembly a party te chak tam dan a zira siamrem thin a ni.
Tun tum inthlanah tu party mahin simple majority an nei thei lo va, chuvang chuan sorkar siam tur chuan coalition sorkar din ngei ngai a ni dawn a ni.
PTI leh PML-N te chuan an chak thu an sawi ve ve chungin coalition sorkar an siam dun theih miah loh hmel bawk a. Hetihlai hian independent candidate chak lo te chuan vote-rigging a awm tiin court ah an zualko ve bawk a. PTI thlawptute pawhin Election Commission office pawnah lungawilohna an lantir bawk.

Sharif PML-N leh Bhutto PPP te thawkho thei?
Thil thleng theia sawi chu PML-N te chuan PPP te leh party tenau dang te nena sorkar intawm siam a ni tiin Prof Samina Yameen, University of Western Austrlia chuan a sawi a. Party pahnih te hian kum 2022 khan Imran Khan petchhuah nan an lo thawk dun tawh bawk.
“Buaina lai tak tur zawk chu tu nge prime minister ni ang tih a ni a, president dinhmun turah pawh harsatna awm thei a ni a, province hrang hranga an inmillohna te pawh chinfel ngai tur a ni” tiin a sawi a.
PML-N te chuan social liberal Muttahida Qaumi Movement (MQM) te seat 17 nei te pawh an rim mek a, heng bakah hian independent candidate dang te pawh an rim bawk.
Zardari leh PML-N delegation Sharif unaupa Sehbaz kaihhruai te chu Lahore ah Pathianni khan an inbe tawh bawk a, mahse, PPP te chuan inngaihtuah rih an duh tia sawi a ni.
PPP ten Khan a PTI nen inzawmna nei thei?
Senior PPP leader Sherry Rehman chuan party kawngka chu party dang te tan a inhawng reng tiin a sawi a. Mahse, Imran Khan media advisor Zulfi Bukhari chuan PTI te chuan coalition sorkar siam ai chuan opposition nih an thlang zawk tiin a sawi thung a.
Chu chu kum 14 lung in tang tura tih mek Imran Khan tanna pawh niin kum 2018 daih tawh khan Pakistan chuan sorkar ngelnghet leh chak a mamawh tia sawiin mahse tichung chuan khatihlai khan MQM te nen sorkar intawm an siam tho thung.

PML-N ten PTI leh party tenau dang te thawhpui thei
PML-N senior leader Azam Nazeer Tarar chan party tin te tel theihna ‘participatory coalition sorkar’ a siam theih tiin a sawi a, chutiang a nih chuan an hmelma ber PTI te chu namnul theih an ni miah dawn lo tihna a ni.
“Imran Khan vote miah lo te pawhin Pakistan army tena amah leh a party tun hnai kum hnih chhunga an sawisak dan chu dik lo an ti tho ang” tiin Georgetown University a thawk Uday Chandra chuan a sawi a, “Democratic fairness tih ang te chu bawhchhiatin a awm tlat a ni” a ti bawk a.
“Pakistani voters ten party aia independent candidate te an thlang zawk tlat chu Army te tan chuan inngaihtuah chianna tham niin civilian democracy dingchang se an duhna a ni” tiin a sawi bawk.

PTI thlawp independent ten party tenau zawkte nen
Thil la awm thei bawk chu PTI thlawp independent te chuan party tenau zawk te thurualpiin coalition sorkar an siam thei bawk a. Independent te chua party tenau zawk te zawmin combine seat an neih hmangin National Assembly a reserve seat 60 leh hmeichhe seat awm te chu remchangah an la thei bawk.
Political party te chuan seat 3.5 an lak zelah women reservation seat khat zel an hauh thei a. Mahse chu chu independent candidate te chuan an chang ve thei lo thung. Chumai bakah inthlan result chhuah atang ni 72 chhungin party an zawm dawn nge independent parliamentarian an ni dawn tih an tihchuan a ngai bawk.
Mahse Asma Faiz, Lahore University of Management Science chuan PTI chuan coalition sorkar a siam theih ring chuang lovin party tenau dang te nen inzawm pawh ni se majority an la phak chuang lo ang a ti thung.