Pakistan-ah fur a na, chhiatna thlengah mi 242 thi tawh
Pakistan-ah fur a na, chhiatna thlengah mi 242 thi tawh
Pakistan-ah sabereka khuangkaih leh lei min avangin mi 21 vel thi awm belh lehin kumin furah mi 242 an thi ta.
Thawhlehni khan hmar lama Gilgit-Baltistan-ah ruah bawhawk sur vanga lei min leh sabereka khuangkaih thleng vangin mi pathum an thi a, khualzin 200 vel tang bawkin a hnuah chhanchhuah an ni.
“Zin veivak mi 200 atanga 250 inkar vel hmun hrang hrangah chhanchhuah an ni tawh a, an zavaiin Pakistani an ni a. Hetih lai hian mi 15 atanga 20 vel chin hriat loh an la awm a, zawn mek zel an ni,” tiin Gilgit-Baltistan-a sorkar hotu, Farmanullah Khan-a’n a sawi.
Khualzin chhanchhuahte hi Chilas khawpuiah hruai niin khualbuk hrang hrangah awmtir an ni.
“Chin la hriat lohte hi sipaite nen zawn mek zel an la ni a. A tula hman atan helicopter pawh chhawp a ni,” tiin Gilgit-Baltistan sorkar thupuangtu, Faizullah Faraq-a’n thu a chhuahah a tar lang.
Thawhtanni khan Diamer district-ah khualzin pali vel tui lian vangin an thi tawh a, mi 15 chin hriat an la ni lo bawk.
Hetih lai hian National Disaster Management Authority (NDMA) chuan Khyber Pakhtunkhwa province-ah naupang paruk telin mi 10 vel an thi bawk tih an sawi.
NDMA chuan thi zinga a tam zawk hi anramin fur ruah an dawn thin zat aia tam an dawn hnua in chim vanga thi an ni deuh ber tih an sawi a. Asia chhim lam ram hian kum 2022 khan tui lian nasa tak tuarin mi 1,700 dawn thiin mi maktaduai 30 chuangin in leh lo an chân.
NDMA thuneitu chuan kumina ruah sur chu nikum aiin a tam fe zawk tih a sawi a. “Ruah sur thawh lina hi July 25 thleng awh turin kan ngai,” a ti.
Thawhlehni khan NDMA chuan Gilgit-Baltistan leh Pakistan awp Kashmir telin hmar lam hmun tam takah lei a min thei tih an sawi.
Mihring maktaduai 250 chuang chenna, Pakistan hi khawvela sik leh sa inthlak nasa tuar na thei ber tura ngaih a ni a. Vur khawn 7,000 chuang awmna niin polar region an tih tih lova hetiang awm tamna ber a ni.
June 26 khan Gilgit-Baltistan-a Disaster Management Authority chuan vur dil insahin sabereka khuangkai a siam theih avangin mipuite chu lui leh tuikawng hnaiha awm lo turin an lo chah tawh nghe nghe.
An khawpui, Islamabad-ah pawh car-a chuang mi pahnih chu an car nen tui lianin a la a. Chhanchhuah hna thawktuten anmahni an zawng mek.