Indian Sikh sang tel chu thlai seng kût, Sikh kum thar ni bawk, Vaisakhi lawmin Pakistan-ah an zin a, he kût hi Punjab province leh India hmar lama an lawm thin a ni deuh bik.
Pakistani thuneitute chuan kuminah hian Indian Sikh 6,500 hnenah visa a pe chhuak a, kum hmasa lamte aiin a pe tam zawk a. Ram pahnih inkara visa inpek hi a harsa angreng thin hle a; mahse, sorkar chuan ruahmanna bik siamin sakhaw hmun thianghlim tlawh tur leh pathian be tur bikte tan kawng a hawng a ni.
Vaisakhi lawmna pui ber hi Punjab province-a Nankana Sahib-ah hman thin niin he hmun hi Sikh sakhaw rinna tichhuaktu, Guru Nanak-a pianna hmun a ni.
Gurdwara Janam Asthan chu Lahore khawpui thlang lam km 75 vela awm, Nankana Sahib-a hmun pakua zinga pakhat a ni a. Hemi tlawhtu zinga mi, India-a Gujarat atanga kal, Rinko Kaur-i chuan Pakistan-a zin chu a hlauh deuh thu a sawi.
“Ka chhungte pawhin min hlauhthawnpui a; mahse, huhova kal tur kan nih avangin kan him dawn tih ka hria a ni,” a ti.
An tum ram an thlen hnuah erawh mipuiin tha taka lo dawngsawngin hahdam takin a awmzui ta tih a sawi.
“An in atangin mite chu an lo chhuak a, min lo lawm a. Milarte ang mai kan ni,” tiin Kaur-i chuan a sawi a. A cham chhungin Pakistan-a Sikh sakhaw hmun pawimawhte a tlawh kual dawn tih a sawi.
British-ten kum za chuang an awp hnua kum 1947-a India leh Pakistan rama a then hnuah Sikh sakhaw hmun thianghlim tam tak hi Pakistan ramah a awm a ni.
Pakistani Prime Minister Shehbaz Sharif chuan Vaisakhi chu ‘lo neitute tana hlimna ni ropui’ tiin a sawi a. Kût chu beiseina, inpumkhatna leh hnam hrang hrangte inzawmna entirna a nih thu a sawi bawk.
Pakistan-ah Indian Sikh tam tak zin
Get real time updates directly on you device, subscribe now.