Pakistan-ah Kristian-te Biak In suasam nasa

Pakistan-ah mipui thinrim pungkhawm chuan Biak In pali ngawt halin Kristian te chenna In an suasam bawk a, hei hi mi pahnihin Quran an tibawrhbang tia an puh vang a nih thu police-te chuan an sawi.
Eastern Punjab-a Jaranwala nena inzawmna nei building eng emaw zah chu tihchhiatin a awm tiin sawi a ni bawk.
Police te chuan mi 100 chuang man tawhin tharumthawhna chhan chhui chianna an nei zui nghal bawk a. Thuneitute chuan Jaranwala boruak a tang hle tiin an sawi bawk.
Police-te chuan tualchhung Krsitian pahnih te lakah blasphemy law thubuai an siamsak bawk a, blasphemy law hnuaiah hian tihhlum hiala inhrem theih a ni.
Mahse he blasphemy law hnuaiah hian tumah tihhlumin an la awm lo nachungin blasphemy a puh te erawh mipui thinrim ten an tihlum fo tawh thung.
Kum hnih kalta khan Sri Lanka mi blasphemy a puh chu mipui thinrim ten tihlumin a ruang an hal zui tawh a. Kum 2009 khan mipui thinrim te chuan Punjab-a Gorja district-ah chenna In 60 hal tawhin mi paruk nunna Islam hmusit tia puhna kal zel avangin an tihlum tawh bawk.
Blasphemy law hi kum zabi 19 na laia colonal hun laia British te kalpui a ni a. Mahse, kum 1980 khan thuneitute chuan he dan hi khauh zawka kalpuiin Islam hmusittute lakah tihhlum hiala hrem theih turin an siam zui a ni.
Pakistan population 96% vel chu Muslim an ni a. Pakistan mai ni lo Muslim ram Iran, Brunei leh Mauritania-ah te pawh blasphemy law hi kalpui a ni bawk.
Heng tualchhung mi pahnih te hian Islam lehkhabu thianghlim Quran chu an tibawrhbang tia sawi avangin lungawilo an pungkhawm nghal vat a. Thuneitute chuan Islam lehkhabu thianghlim pawhthler chu Christian community te awmna bulah hmuh a ni an ti.
Chu chuan Muslim te tithinrimin social media ah thehdarh zui a ni a, tharumthawhna chhuak zuiin Kristian-te chenna hmun te chu rawkin an suasam zui ta a ni.
Kum 31-a upa Kristian Yassir Bhatti chuan an chenna an chhuahsan thu a sawi a, “Tukverh tichhiain an lut a, kawngkhar atangin fridge, sofa leh chair ang te chu lachhuakin Biak In hmaah hal turin an chhekkhawm a ni,” a ti a.
“Hei mai bakah hian Bible pawh tibawrhbangin an hal zui bawk a, zahngaihna an nei lo,” tiin a sawi bawk.
Heng mipui thinrim te hi a tlangpuiin Islamist political party tehreek-e-Labbaik Pakistan (TLP) te an ni ber tiin sorkar lam chuan an sawi laiin TLP te chuan an hnawl thung a.
Caretaker PM Anwar ul-Haq Kakar chuan tharumthawhna thlentute lakah hremna lekkawh a ni ang, a ti zui nghal thung a. Amir Mir, Punjab province information minister pawhin mipui thinrim te chetdan chu a dem thu sawiin police tam zawk tirh luh nghal an nih thu a sawi bawk.
Pakistan bishop Azad Marshall, Lahore a awm chuan Kristian te chu thil thleng chuan a tina hle tiin a sawi.