Pakistan hnenah thu pawimawh hrilhtu nia hriat man

Pakistan hnenah thu pawimawh hrilhtu nia hriat man
Ram do zawng leh himna tiderthawng thei zawnga chete laka beihpui thlakna kal zelah Haryana police chuan mipa pakhat, tun hnaia India leh Pakistan inepna boruak tang tak a awm laia Islamabad hnena thu pawimawh tak tak hrilhtu nia sawi an man.
An mi man hi Arman-a niin Nagina police-in Zirtawpni khan thu an dawn bawhzuia an man a ni.
ANI hnenah Nuh Deputy Superintendent of Police (DSP) Ajaib Singh chuan, “Kan la kawl mek a, hriat belh tur thil kan la khawm mek zel a. Finfiahna kan nei a, kan la chhui zel ang,” a ti.
Travel vlogger leh YouTuber pakhat chu Haryana Police vekin tun hnai khan Pakistan tana enthlak hna thawk nia puhin an man bawk a, ani hi tual chhung court chuan ni nga chhung kawl an phalsak.
Police chuan a laptop leh a mobile an endiknaah ‘thil rinhlelhawm’ an hmu tih an sawi.
Hisar Deputy Superintendent Kamaljeet chuan vlogger hi Pakistani khua leh tui nen ‘an inbe reng’ niin a sawi.
“Nimin khan thu kan dawn angin Jyoti-i chu Official Secret Act leh BNS 152 tlawhchhanin kan man a. A mobile leh laptop-ah thil rinhlelhawm kan hmu a. Ni nga kan kawl dawn a, kan chhui mek zel,” tiin Inrinni khan a sawi.
Standing Committee on Information Technology Branch-in tun hnaia hriattirna a chhuahah, “April 22, 2025-a Pahalgam beihna a thlen hnuah social media influencer leh ram chhunga social media platform hrang hrangah ram tihim lo zawnga chetna a awm a, hei hian tharum thawhna a thlen zui thei,” tiin an lo tar lang tawh.
Committee chuan electronics & IT ministry leh information & broadcasting ministry hnenah heng platform-te hi IT Act 2000 leh Information Technology (Intermediary Guidelines and Digital Media Ethics Code) Rules, 2021 tlawhchhanin khap (ban) turin May 8 khan a lo thlen tawh.
Pahalgam, Jammu & Kashmir-a mi firfiakte chetnaah khan mi 26 an thi a, a tam ber kha khualzin an ni.
Indian sipaite chuan phuba lak nan Operation Sindoor tia hming vuahin May 7 zing khaw var hma khan Pakistan leh Pakistan-in a awp Kashmir chu a kap zui.
Operation Sindoor-ah hian mi firfiak 100 chuang, Jaish-e-Mohammed, Lashkar-e-Taiba, leh Hizbul Mujahideen-a tel an thi niin India chuan a sawi.
He beihna hi Pakistan pawhin chhang letin Jammu & Kashmir-a Line of Control hrulah ram pahnih hi an inbei nasa hman viau a. India hian a kah zuinaah Pakistan-a radar infrastructure, communication centre leh airbase 11 a kap leh bawk.
May 10 khan inkahhai puan zui a ni a, hemi hnuah hian inbeihna boruak a awm tawh rih lo.