Pakistan in firfiakte puiah India a puh

Pakistan chuan an ram tihderthawn nan leh sumdawnna lama China nena an inkungkaihna tihchhiat nan India-in firfiakte puia an ram a beihtir thin niin Pakistani thuneitu sangten an sawi.
Pakistan leh India hi a chhe zawnga inpuh tawn reng ni mah se hetiang hawi zawnga Pakistani hotu lianten finfiahna neia inchhala an thenawm ram a puh hi a thleng tam lo hle.
Islamabad-a Foreign Minister Shah Mahmood Qureshi leh sipai thupuangtu, Major-General Babar Iftikhar ten thuthar lakhawmtute an kawmnaah Indian intelligence agent-te chu Afghanistan-ah fehchhuakin he ram atanga Pakistan ramria pawi khawih dan tur an ruahman niin an sawi.
“India hian a ram chhungah Pakistan beih tum firfiakte a awmtir,” tiin Qureshi chuan a sawi a, New Delhi hi a thenawm ram dang pawh beih tumin a inruahmanna niin a sawi bawk.
Qureshi chuan Pakistan-in finfiahna a neihte chu United Nations-ah thawnin India chu enchiang turin an ti dawn tih a sawi a, “Ram dang an inrawlh loh chuan Asia chhim lama nuclear nei ramah inkarah hian muanna tak tak a awm thei dawn lo,” tih a sawi bawk. “Heng finfiah hmang hian hnial rual lohva chiangin kan ram leh khawvel ram dangte hmuhah kan pho chhuak dawn, tiin minister hian a sawi bawk.
Himalayan tlangdunga an inrina hi hun rei tak ata tawh ram pahnihte an inepna hmun leh chhan ber a ni. Pakistani sipaia media & public relations office hotupa, Iftikhar chuan an ram beihna hrang hranga India inrawlhna finfiahna a tihte a pho lang a. Heng zingah hian bank receipt, Jalalabad, Afghanistan-a Indian consulate-a an ram beitu mi firfiakte pawisa pekna leh thlalakte pawh a tel.
Iftikhar hian Indian intelligence agent-te hian China-Pakistan Economic Corridor hnuaia Chinese-ten Pakistan rama hmasawnna ruhrel an dinte chu an tum hle tih a sawi bawk.
October, 2016-a Gwadar khawpui chhimthlang lama khualbuk changkang beihna rapthlak tak thlengah pawh khan beihna thlen hma leh a hnuah a beitute leh Indian intelligent-te chu telephone-in an inbiak thu Iftikhar-a hian a sawi bawk.
Chinese company-te hi Gwadar khawpuia lawngchawlh hmunah hian inbunin Pakistani-Chinese sumdawnnaa an kalkawng pawimawh tak a ni. Sipai thupuangtu hian UN pawhin firfiak pawla a chhal – Tehreek-e-Taliban Pakistan, Jamaat-ul-Ahrar leh Allah Nazar-a kaihhruai Baloch Liberation Army te pawh India hian a pui reng niin a sawi bawk.