Pakistan-in kum lia a vawi hnih nan Islamist pawl ban leh

Pakistan-in kum lia a vawi hnih nan Islamist pawl ban leh
Chawlhkar liam ta maia an mite leh police innawrnaa mi panga an thih hnuah Pakistan chuan kum li chhunga a vawi hnih nan Islamist party chu Ningani khan an awm a khap leh tan.
Tehreek-e-Labbaik Pakistan party mi leh sate hian US President Donald Trump-a’n Gaza indonaa inkahhai a puan hma lawk khan Israel an duh lohzia lantir nan kawng an zawh a, hemi tum hian police nen an innawr nasa hle a ni.
Pakistani cabinet chuan an party hi an ban tih Ningani khan sorkar thuchhuahah tar lan a ni a. “TLP hi firfiakte leh tharum thawhna hawia chetnaah an inhnamhnawih a ni,” an ti.
An pawl chuan an awm khap a ni hi an duh lo hle a, ‘danpui kalh, thu lai la lo, dan lo leh mi pakhat thuneihna anga kalna’ nia an ngaih thu an thuchhuahah an tar lang zui.
Sunni Muslim pawl lian tak ni ta hi kum 2011 khan province governor pakhat, sakhaw sawi bawrhbang nia puh thattu police pakhat tihhlum vuina inkhawm atanga sorkar nawr kaltu (pressure group) anga indin tan an ni.
Kum 2016 khan politics an luhchilh zui a, tunah hian an rama party lian ber palina niin kum 2018 inthlanpuiah pawh khan vote maktaduai hnih chuang an hmu phak nghe nghe.
TLP hian punkhawmna lian tak tak an huaihawt nasa hle a, sakhaw thil atanga politic thilah inhawr khawm hi an huaihawt deuh ber thin a. Gaza-a indona atanga French satirical magazine Charlie Hebdo-in Prophet Mohammad-a lem an tihchhuah duh lohna thlengin an lantir a ni.
Party hi Prime Minister Imran Khan-a kaihhruai sorkar khan kum 2021 khan tharum thawha lungawi lohna an lantir avangin a lo ban tawh a. Thla ruk hnuah tharum thawh tawh lo tura an insawi avangin hlih leh a ni.
Pakistan-ah hian sakhaw sawi leh tihbawrhban chu thi tura inhrem theih a ni a. Mihring dikna chanvo humhalhtu pawlte chuan hetiang dan hi hman sual theih tak niin mi tu emaw bitum bika dik lo taka hman a ni thin tih an sawi a. Islam leh prophet sawi chhiaa puhin mi tam tak chil hlum an lo ni tawh a ni.