Pakistan paramilitary hmunah thihchilh bomb pahnih tipuak
Pakistan paramilitary hmunah thihchilh bomb pahnih tipuak
Thihchilhtu pahnihin Thawhtannia Pakistani paramilitary force headquarters an beihnaah venhim hna thawktu pathum an thi a, mi dang 12 velin hliam an tuar bawk.
Police chuan thihchilh bomb tipuaktute pahnih hi ralthuam nena inthuam niin Pakistan hmarthlang lam, Peshawar-a Federal Constabulary headquarters an bei tih an sawi a. A tituah hian eng pawl mah an la inchhal lo.
Constabulary complex hi Peshawar-a venhimna thatna a ni a, a beitute hian a vengtu chhawng tam tak an paltlang a ni.
Thil thleng hmutute chuan zing dar 08:10 (India-a zing dar 08:40) velah thil puak ring tak pahnih an hriat thu tual chhung chanchinbute hnenah an sawi.
A hmun hi khar nghal niin rescue team-ten an thutchilh nghal a. Thuneitu pakhat chuan venhim hna thawktu panga leh civil mi pasarihin hliam an tuar niin a sawi.
Pakistan thuneitute chuan ‘mi firfiakte chet tumna tihtlawlh’ tiin an sawi a, a beitute hian building chhung an luh hmain gate bulah kah thluk an ni a, an bomb pai an tipuak ta niin an sawi.
“A titute hi a rang thei ang berin tute nge an nih hriat chhuaha hremna pek an ni ang,” tiin Pakistani Prime Minister Shehbaz Sharif-a chuan a sawi.
Pakistan-a Federal Constabulary hi tun hmaa Frontier Constabulary tia hriat thin niin police-te tih theih piah lama che thin an ni a, an hmalakna zingah tribal-te helna leh mi sual pawl pawikhawihna bawhzuite pawh a tel.
Peshawar hi Afghanistan nena inri, Khyber Pakhtunkhwa province-a awm niin tun hma atang tawhin hel pawlten tharum an thawh nasa hle.
Pakistani Taliban, Tehreek-i-Taliban Pakistan (TTP) tia hriat lar bawk chet nasatna province a ni a, ram chhung hmun dangah pawh hetiang beihna ang chi hi an thlen nasa hle.
Chawlhkar hnih liam taah pawh khan Pakistani khawpui, Islamabad-a court tualah thihchilh bomb puakin mi 12 an thi a, mi dang 27 velin hliam an tuar a. Pakistan chuan India leh Afghanistan inrawlhah a puh a, finfiahna erawh a awm lo va, ram pahnihte hian an pha ve ve bawk.
TTP chuan he beihna hi an tih niin an chhal.
February thla khan Khyber Pakhtunkhwa-a Islamic pathian thu zirna hmuna thihchilh bomb tihpuahah mi paruk an lo thi tawh bawk a, hei hi thla thianghlim, Ramadan intan hma lawka thleng a ni a. Eng pawl mahin an tihah an chhal lo.