Palace in Liverpool an hnawtchhuak

Liverool chetchhiat a kal tluang a, an khelh hnuhnung pasarihah a vawi ruk nan nilai zana an khingpui Crytal Palace hneh lova tlawmin Carabao Cup quarter-final an inhlangkai zo lo. Liverpool an tlawm lai hian Chelsea chuan Wolves hneh hramin quarter-final an lut ve thung.
Liverpool hian EPL season kal meka an hneh loh hmasak ber Crystal Palace chu Anfield-ah an mikhual. An khelh chhiat lai ni bawk mah se manager Arne Slot chuan luhlul a chhuah a, rawlthar pathum ngawt bul a tantir a, Brentford laka an tlawm tuma an player 10 ngawt a thlak bawk. An player thate awltirin khel ngai lo zawkte bul a tantir. Sawisel leh duhkhawp hlawh zo lo mek si sa chungin ngawhngawl a chhuah a, an mualah ngei an tlawm zui leh bawk si vangin sawisel a hlawh nasa zui hle.
Liverpool leh an mikhual Crystal Palace te hi an inhnehtawk viau a, goal pawh a lut lawk thei lo. Mualneitu Reds in bul an tan tha a, an khingpuite nawr betin goal thun theihna hun tha vawi thum ngawt an nei a, hlauhawm an siam mawlh mawlh. An hun tha an chhawr tangkai theih loh vanga goal lut a awm theih loh reng hnuin chawlhlawk dawn hnaiah Palace an che fuh a, goal hnih an thun zawn. Eagles tan hian Ismaïla Sarr chuan an hun tha neih hmasak a chhawr tangkai a, minute 41-naah lei hrulah pet goal in hmahruaina goal a thun.
Goal thun hmasa zawk an nih vangin Crystal Palace an phur a, inrintawkna sang zawk nen an inlan chhunzawm. Hmahruaina goal an thun hnu lawkah fing leh mawi zetin Liverpool tlarhnung an thiat a, goal hmahruai thuntu Ismaïla Sarr tha zeta a tawp kharin an goal hnihna a thun a, an hmahruaina a tizau. Liverpool laka goal hnih thun Ismaïla Sarr hi season tharah a khel tha viau a, inelna hrang hrangah goal ruk a thun tling der tawh.
Chawlhlawk hnu lamah Liverpool in an si phurh sut tumin tan khawh nasa viau mah se an hlawhtling zo lo. Palace in counter attack in an ngawt let thur a, hlauhawm an siam. Liverpool player Amara Nallo chu Justin Devenny a tihtluk vangin hnawhchhuah a ni. Si hnih phur chunga tlem zawk an nih leh zel vangin Reds an sen lar thei tak tak tawh lova, hlauhawm siam khawpin an mikhualte an nawr let thei meuh tawh lo.
Goal thun an mamawh em em laiin Arne Slot a team te an chesual zui leh ta zel. Ball an inpek sual vangin Crystal Palace in an nawr let a, hun tha an neih phah. Yeremy Pino chuan inringtawk tak a khalh tlang hnuin mawi takin a pet goal a, minute 88-naah an goal thumna a thun. Pino goal thun hnu hian goal dang a luh belh thei tawh lova, Liverpool chuan an tualzawlah ngei si thum fai ngawtin an tlawm a, Carabao Cup atangin an puanthuah an tel fel zui ta a ni.
Liverpool hi tunhnai Carabao Cup-ah an chetha thei viau a, season thum chhungin vawi hnih an champion a, season liam ta pawh khan final an lut hial. 2025-ah erawh beisei an phak ta lo viau thung a, quarter-final em pawh lut zo lovin an tla zui ta a ni. Anfield-ah season thara khel tha Crystal Palace an hmachhawn tum hian Virgil van Dijk, Ibrahima Konate, Dominik Szoboszlai, Cody Gakpo, Florian Wirtz, Mohamed Salah leh Hugo Ekitike te squad-ah telh an ni lova, he thutlukna huaisen thlak tak hian sawizui a hlawh ngei ang.
Chelsea an chak
An mualah Liverpool an tlawm laiin Chelsea chuan Mimualah harsa takin hnehna an chang ve thung a, quarter-final an lut. Chelsea hi EPL-a talbuai mek Wolves hmachhawn turin Molineux Stadium-ah an lenglut a, 4-3 in an chak.
Chelsea hian mikhual an nihna hmunah bul an tan tha viau a, goal pawh an thun hma hle. Inkhel tan atanga miute 5-na lekah Andrey Santos chuan hmahruaina goal a thun nghal. Chak tura rinkai zawk ni chunga goal an thun thuai vangin Chelsa tan chet a awlsam leh zual a, goal dang pawh an thun belh leh thuai. Tyrique George chuan minute 15-naah an goal hnihna a thun a, Estêvão chuan minute 41-naah an goal thumna a thun belh zui leh a, 3-0 ngawta hmahruai chungin chawlhlawk an hmang.
Chawlhlawk hmain khel chhe viau mah se chawlhlawk hnu lamah Wolves an khel tha viau thung a, goal thum ngawt an thun. Second half tan atanga minute thumna lekah Tolu Arokodare chuan goal thunin an si phurh a sut then a. David Wolfe chuan minute 73-naah goal thunin an inkar a tizim leh zual. Wolves in goal hnih an thun zawn a, an phur viau laiin an phurna tizual turin Liam Delap chu minute 86-naah hnawhchhuah a ni leh ta zel a, Chelsea dinhmun a him lo tak zet tawh.
Tlem zawk ni a, hlauthawng dep dep tawh Chelsea tan hian Jamie Gittens chuan minute 89-naah an goal lina thunin, an inkar a tizau nawn leh. Hun a tlem tawh vangin Blues in si hniha hma an hruaina humhim ngei tumin tan an khawh a, Wolves in an si phurh sut zawh ngei an tum bawk a, inkhel a hmuhnawm hle. Inkhel tihmuhnawm leh zual turin David Wolfe chuan minute 90+1-ah an goal thumna a thun leh ta mai a, hei hian a tiphur leh zual hle. Wolves in an si phurh sut zawh ngei tum viau mah se Chelsea an inveng tluan thei hram a, harsa takin hnehna an chang zui ta a ni.