Palm wine thianghlim lo in vangin mi pahnih thi, mi 28 la enkawl
Palm wine thianghlim lo in vangin mi pahnih thi, mi 28 la enkawl
Palm wine, toddy an tih thianghlim tawk lo ni ngeia hriat in vangin Telengana-ah mi pahnih an thi a, hmeichhia 12 telin mi 28 enkawl mek an ni tih Nilaini khan thuneituten an sawi.
Hyderabad-a police hotu chuan Thawhlehni zana damdawi ina dah luh pahnih chu an thi tih a sawi.
State Excise & Prohibition Department thuneitute chuan mi 28 chu toddy an in hnuah an damlo zui tih an sawi.
Sorkarin a enkawl, Nizam-a Institute of Medical Sciences-ah damlote enkawl niin an zinga pathum chu an dinhmun a tha lo hle tih an sawi.
“Thawhlehni zan khan mi 15 chuang damdawi inah dah luh an ni a. Nilaini tukah khan 28 an tling tawh,” tiin department chuan thu a chhuah.
Heng mite hi July 6 leh July 8 inkara khawpui chhunga Kukatpally, Balanagar leh hmun dang dang toddy dawra inte an ni a, an pum a nawm loh zui avangin Thawhlehni zan atang khan damdawi inah dah luh tan an ni.
“An zinga pathum hi an dinhmun a tha lo hle a, pakhat hi Inotropic support pek a ni a, pakhat hi a kal thuahsak a ni a. Pakhat dang pawh ventilator nena thawktir niin pakhat kal thuah ngai a awm bawk,” tiin NIMS chuan thuchhuah a siam a. Telangana Excise & Prohibition Minister Jupally Krishna Rao chuan damlote hi tlawhin a kawm kual hlawm.
Damlote hi an nat dan a inang deuh vek a, toddy thianghlim tawk lo an in vanga puh a ni rih phawt tih minister chuan a sawi a. Police leh excise thuneituten an chhui mek tih a sawi.
Excise department thuneitute chuan mi panga an man tawh tih an sawi a. An inna toddy dawrte chu khar a ni a, sample lain endik tura lak a ni a, damlo enkawl mekte atanga an lak pawh forensic science lab-ah endik a ni dawn bawk tih minister chuan a sawi.
Minister hian he thila thil ti sual leh mawhphurtu chu na taka hrem an ni dawn a, an dawr hawn phalna pawh tihtawpsak an ni dawn tih a sawi a. Hetiang thil hi a thlen zui tawh lohna turin hma an la nghal dawn tih a sawi bawk.
Telangana Health Minister C Damodar Rajanarasimha pawhin damlo enkawltu doctor-te biain an enkawl mekte dinhmun a zawt a, a tha thei ang bera enkawlna pe turin a ti.