Finance Ministry chuan Permanent Account Number (PAN) leh Aadhaar te thlunzawmna hun chu March 31 atangin June 30, 2023 thleng a pawtsei a. Thuchhuah siama Ministry chuan hetih chhung hian Aadhaar leh PAN te la thlunzawm lote chuan thlunzawm ngei turin ngenna a siam a ni.
A hma chuan PAN leh Aadhaar thlunzawm hun tawp hi March 31 thleng tih a ni a, mahse, mi tam tak ten an la thlunzawm hman loh vang leh PAN te chu hman tlak loha a awm mai dawn avangin June 30 thleng atan pawhsei a ni leh ta a ni.
“July 1, 2023 atang chuan taxpayer te PAN Aadhaar nena thlunzawm lo te chu hman theih lohin a awm tawh ang,” tiin Ministry thuchhuak chuan a sawi a.
He mi hun chhunga thlunzawm lote chuan an PAN chu an hman leh theih nan ni 30 chhung hun an nghah a ngai dawn a, chu mai bakah thlunzawm leh nan Rs 1,000 an chawi a ngai dawn bawk.
Ministry chuan data an tihchhuahah India ramah PAN leh Aadhaar thlunzawm tawh 51 crore chuang an awm tawh an ti bawk.
PAN leh Aadhaar thlunzawm tur hian Income Tax e-filling portal ah luha Aadhaar-Pan linking status enfiah mai tur a ni a. Homepage ah kalin Quick Links tihah lutin chutah Link Aadhaar Status tih a lo awm leh a.
He page a luh tawh chuan field pahnih lo awmin chutah chuan taxpayer tena PAN leh Aadhaar number an chhutluhna tur a lo awm a ni.
Server-in a enfiah hnuah pop-up message lo langin chutah chuan Aadhaar leh PAN te thlunzawm a ni tih a rawn tarlang mai dawn a ni.
Document pahnih te a inthlunzawm lo a nih chuan screen ah PAN leh Aadhaar a inthlunzawm lo tiin thlunzawmna tur link a pe mai dawn bawk.
PAN leh Aadhaar thlunzawm hun pawtsei
Get real time updates directly on you device, subscribe now.