Pancreatic cancer damdawi neem

Scientist ten zirchianna an neih hnuah neem hnah chu pancreatic cancer enkawl nan a hman theih niin an sawi. Mithiam te hian chaihchim-ah enchhin neiin, an hlawhtling niin an sawi.
Scientist-te chuan neem hnaha awm nimbolide chu chaihchim-ah enchhinin, pancreatic cancer cell chu tai darh tur 70%-in a tihniam thei a, chumi awmzia chu cancer cell taidarh tur a veng thei dawn tihna a ni.
Neem hi India-ah hmuh tur a tam hle a, chutiang neem hnah atanga an lakchhuah nimolide chu pancreas cancer damdawi atan a tha dawn hle tih an hmuchhuak ta a ni. An zirchianna atanga an hmuh dan chuan cancer tai darh tur a titawp a, cell hrisel tha pangngai tichhe si lovin cancer cell thang zel tur a lo tichhe thei dawn a ni.
Texas Tech University Health Sciences Center El Paso-a scientist Rajkumar Lakshmanaswamy chuan, “Nimbolide atanga kan thil hmuhchhuah hi a ropui hle a ni, cell hrisel tha pangngai tibuai chuang lo va cancer cell treatment atana a hman theih hi a phurawm takzet a ni,” a ti a, “Nimbolide hian pancreatic cancer chu angle hrang hrang atangin a bei vak a ni ber mai,” a ti bawk.
He an thil hmuhchhuah a an phurna ber pakhat chu nimbolide-in cell hrisel tha pangngai a khawihchhe ve chuang lo hi a ni a, hei hi in vitro leh in vivo experiment an neih atangin a chiang tawh niin an sawi.
Pancreatic cancer hi cancer-ah pawh a hlauhawm ber pawla sawi thin a ni a, thih theihna risk pawh a sang ber a, pancreatic cancer nei reng reng chu an nei tih hriatchhuah atanga kum 5 chhungin 94% an thi hman niin an chhut. A cancer hi a thang chak hle a, tunah hian a enkawlna tur damdawi tha tawk tak a la awm lo niin an sawi.
TTUHSC El Paso a mi Ramadevi Subramani chuan, “India-ah mi tam takin neem hi an ei a, side effect a neih awm hriat a ni lo, chuvangin nimbolide hi pancreatic cancer enkawl nan pawh hmang i la chemotherapy leh radiation angin side effect a nei ve dawn lo a ni,” a ti ve bawk.