Pandemic len hnua BRICS meeting pawimawh ber nei dawn

Tunkar hian Johannesburg khawpuiah Brazil, Russia, India, China, South Africa (BRICS) hruaitute chuan inhmuhkhawmna nei dawnin South African President Cyril Ramaphosa-an a thleng dawn a ni.
BRICS hi a nihna takah chuan ’emerging economies’ te intetelkhawm an ni ber a, hei vang hian economic issues te chu ngaih pawimawh berah an nei a. Mahse, tun hnaia Ukraine indona avangin BRICS summit chuan hun dang zawng aia ngaihven leh pawi mawhna a neih zual phah ta a ni.
Loh theih lohin Western capitals tam tak te chuan summit chu uluk takin an thlithlai lo thei dawn lo va. French Preasident Emmanuel Macron phei chuan ‘sawm ni se chuan’ a tel ve tur thu a sawi a. Mahse, France leh Western ram te chu sawmin an awm lo thung.

Eng vangin nge 15th BRICS summit a pawimawh?
Tun BRICS inhmukhawmna hi geopolitical leh geoeonomic boruak avangin a pawimawh zual hle a, kum 2019 hnuah COVID-19 pandemic len hnua hmaichhana inhmuha summit neih hmasak ber tur a ni a. Kum 2022 pawh khan Covid a zuai viau tawh chungin China-ah pandemic kaihhnawih khuahkhirhna a la awm nasat avangin video conference-a neih a ni. Kumin hi kum 2022 a Russia-in Ukraine a run hnua hmaichhana inhmuhkhawmna neih hmasak ber tur ni bawkin Ukraine buaina hian khawvel pum tibuaiin, food, fertilizer leh fuel security a tibuai hle a ni. US leh EU tena Russia chu Ukraine run avanga kawmserh zui zel an tum lai a nih bawk avangin BRICS sawihona chu pawimawh hle tura ngaih a ni bawk a. Kumin hi Luiz Inacio Lula da Silva Kula an Brazil a thuneihna a chan hnua summit hmasa ber tur ni bawkin Lula chu socialist tak, anti-western policy nasa zawka kalpuitu a ni bawk.

India tan a pawimawhna?
Kumin BRICS summit hi India tana pawimawh chungchuanga ngaih a ni a. Kum 2020 a China nena Line of Actual Control a inngurna an neih hnua summit hmasa ber tur a ni a, Prime Minister Narendra Modi leh China President Zi Jinping te chu BRICS meet-ah hian hmaichhanah an inhmu dawn a.
Samarkhand a Shanghai Cooperation Organisation (SCO) summit ah leh nikuma Bali a G20 meetinga-ah an inhmu tawh tho nachungin BRICS summit-ah hi chuan mi tlemte zawk leader pali te chauhin thil pawimawh sawina an nei dawn a ni.
Summit hmain 19th round of India-China Corps Commander Level Meeting neih niin kar kalta khan thuchhuah intawm siam a ni a, hei hi Modi-XI inhmuhna neih hmaa hmalak lawkna vek a ni bawk a. Ram pahnih hruaitute inhmu tur hian pawimawhna tak nei dawnin ramri LAC-ah sipai 1,00,000 vel inralring renga an la awm lai a ni bawk.
Chu mai bakah BRICS summit neih zawh hnu lawk karhnih lekah India chuan G20 summit a thleng dawn bawk a. He meeting-ah hian member te an kal that chu Prime Minister Modi mawhphurhna a nih dawn avangin pawimawh hle tura ngaih a ni bawk.
India chuan September 9-10 a summit neihnaa Leader’s declaration siama common language neih tur China leh Russia-in a dan tlatah chhanna a beisei bawk a. BRICS summit-ah hian Modi chuan Ukraine, climate change, debt financing te chu a sawi dawna ngaih a ni bawk.

Tute nge tel dawn?
Prime Minister Narendra Modi, Chinese President Xi Jinping leh Brazilian President Lula te chuan President Ramaphosa te nen August 22-24 ah meeting neiin summit tawpa tihchhuah tur ‘Johannesburg Declaration’ an ngaihtuah ang. President Xi chuan South Africa chu a hranpaa tlawhna nei dawn bawkin Modi chuan Delhi a pan hawna lamah Greece a tlawh dawn bawk a. Russian President Vladimir Putin erawh ‘mutual agreement’ siam hmangin a tel dawn lo thung a. Putin hi International Criminal Court (ICC)-in man tura thupek a tihchhuah a nih avangin South Africa chu ICC signatory a nih bawk si avangin buaina nasa zawk a awm hlauhawm avangin a tel dawn lo a, video conferencing hmanga telin a aiawhin Russian Foreign Minister Sergey Lavrov a tel thung ang.
BRICS leaders te bakah hian South Africa chuan thlengtu a nih avangin African Union (AU) leader 55 te a sawm bawk a. Anni bakah hian Asia, South America leh small Island States hruaitu 20 vel an tel dawn bawk a ni.

Agenda lian ber tur te
BRICS-Africa Outreach leh BRICS Plus Dialogue chu pawimawh ber te zinga ngaih a ni a. Hei bakah hian BRICS tihlen pawh ngaihtuah tur a ni bawk a. BRICS hian kum 2009 khan inhmukhawmna hmasa ber neiin kum 2010 khan South Africa telh a nih hnuah BRICS a ni ta a ni.
BRICS hnuaiah hian New Development Bank, Contingency Reserve Arrangement for security, R&D centre for vaccine leh thil pawimawh dangte an tihlawhtling tawh a. A awmzia berah chuan G-7 te neitu ber niin zau zawkin a inphan mek bawk a. Ram 40 chuangin BRICS zawm an duh tawh a, ram 19 chuan dilna an theh lut tawh a ni. Heng zingah hian Argentina, Saudi Arabia, UAE leh Iran te chu member atana lakluh mai theih dinhmunah an awm tawh nia sawi a ni bawk.
BRICS leader te chuan intra-BRICS trading lam an sawiho dawn bawka hei hi ram tin national currency te hman tlan theih tura hmalakna tur a ni a. A hmaa dollar thlakna tur “BRICS currency” siam rawtna erawh tun tuma ngaihtuah tura chhawpchhuah zingah a tel lo thung.
Kumin summit-ah hian a thlengtu South Africa chuan theme-ah “BRICS and Africa: Partnership for Mutually Accelerated Growth, Sustainable Development, and Inclusive Multilateralism” tih chu a thlang a ni.