Paolini hnawtchhuaktuRussian Rakhimova

Paolini hnawtchhuaktu
Russian Rakhimova
Kumin Wimbledon wo-men’s singles draw zet chu seeded player-te an hek hauh hauh hle mai a, Nilaini zan khan nikum women’s singles runner-up leh kumina fourth seed ni chunga inlan Italian nula beiseiawm Jasmine Paolini pawh second round paltlang zo lo zawngin a tla thum ve leh tak a, ti hian, top five women’s seed-te zinga dam awmchhun chu world number one Aryna Sabalenka chauh ni tawhin, Belarusian hi seed chang sang panga zinga third round khel thei kan hmuh chhun a ni dawn!
Tun hi professional era chinah Wimbledon 2018 hnu lama All England Club-a heti ang thil a thlen leh vawikhatna chiah a ni.
Kum 29 mi Paolini laka 4-6, 6-4, 6-4 hnehna chang Russian Kamilla Rakhimova tan tun kha top 10 player a hneh vawikhatna niin, All England Lawn Tennis and Croquet Club, London-a Wimbledon Championships khelh mek round tir lamah rin loh pui pui an tla a, a ngaihnawmin, a hmuhnawm chho zel dawn ni pawhin alang.
Italian fourth seed Paolini khan first round-ah Anastasija Sevastova hnehin, unseeded Rakhimova lakah pawh harsatna lian tawk loa tlang zui leh tura beisei a ni a, mahse, kum 23 mi Rakhimova khan grasscourt Grand Slam-a a chetthat ber hun a tawngbaw chho laklawh a, chuti maia tawpsan a tum lo!
Top 10 seed tla tharlam ber Paolini kha women’s draw lama seeded player 16 tla tawh zinga tla tharlam ber ni rihin, nikuma Wimbledon leh French Open final khel ve ve thei kha kumin SW19-ah chuan second round paltlang zo lo zawngin a tawp a, Russian world number 62 Rakhimova dan theih tawk lek a ni rih!
Wimbledon ni thumnaa seed chang pha tla ve dangte chu 12th seed Diana Shnaider, Brazilian 21st seed Beatriz Haddad Maia, Croatian 22nd seed Donna Vekic leh Canadian 29th seed Leylah Fernandez-te an ni.
Top five women’s seeds zinga third round lut awmchhun ni ta Sabalenka khan second round match dangah Czech Republic player Marie Bouzkova chu 7-6, 6-4-a hnehin, seeded player an tlak phai duak tawh avangin Grand Slam title pathum a lak tawh belhchhah turin a la sualchhuah ve loh Wimbledon title hi a hnai ta kuarin a hriat a; mahse, a elpui lian ni chho hlawm tura ngaih zinga mi second seed Coco Gauff, number three Jessica Pegula, fifth seed Zheng Qinwen leh number nine Paula Badosa-te meuh pawh first round paltlang zo loa an kalbo tawh avangin fimkhur ve a ngai tih a inhai lo!
Czech world number 48 Marie Bouzkova lakah pawh khan set hmasa zawkah a talbuai laih hman a, US leh Australian Open title a lak tawh belhchhahna’na grass-court grand slam hi a tinzawn zui zel thei a nih pawhin a fimkhur ve hle a ngai dawn niin a lang!
Kum 27 mi Belarusian hian kumina major tournament pahnih khelh tawhah final lut ve ve mah se Australian Open hmawrbawkna inkhelah American Madison Keys a ngam lo a; French Open final-ah pawh American player bawk Coco Gauff a hneh lo leh.
Sabalenka hian Nilaini inkhel danga 2023 Wimbledon champion Marketa Vondrousova hnehtu British number one Emma Raducanu chu zanin round three-ah a su leh ang.
Raducanu hian second round match-ah Czech Republic nula hi 6-3, 6-3-in a paltlang a, Grand Slam champion ni tawh ve ve, harsatna hrang hrang avanga ranking lama hniam ta tlat, All England Club-a unseeded player ni ve ve inbeihnaah Briton a chungnung zawk hle a ni.
2023 champion Vondrousova zawk kha Berlin khawpuia grasscourt title a lakna kawnga Australian Open champion Madison Keys leh world number one Aryna Sabalenka hneh zo hlimhlawt, chak rim nam vang vang chunga All England Club vaklut a nih avangin rin a kai zawk mah em aw a tih theih a, mahse, Centre Court-ah tantu ngah zawk Raducanu game a parh tlat mai a, hliam bawhbuaitu a neih loh lai tak a lo ni kher bawk nen kum 2021-a US Open title a hlawhchhuah nawlh belhchhah turin kawng dik a zawh zui zel rih – kawng a la hui deuh mai pawh a!
Raducanu hi Wimbledon-a a vawi li chhuahna niin, tuntum hi last 32 a luh vawi thumna a ni.
Round thumna chuangkai dang American Keys chuan harsatna tawk loin Serbian 37th-ranked Olga Danilovic lakah 6-4 6-2 hnehna nuamsa angreng tak a hlawhchhuak a; four-time Grand Slam champion Naomi Osaka pawhin 6-3 6-2-in Katerina Siniakova a hneh ve bawk.
Kum 30 mi ni tawh chunga All England Club-a Grand Slam hnehna dang a chan leh theih chuan Australian Open champion Keys hi the great Serena Williams hnu lama season khat chhunga he major trophy pahnih hawn leh thei hmasaber a ni ang.
6th seed Keys hian German Laura Siegmund lakah fiahna dang a hmachhawn zui leh ang.