MBBA Inter Veng 2025Hnuhma nei hrawl Saron Veng leh Republic Veng inlan ni
MBBA Inter Veng 2025
Hnuhma nei hrawl Saron Veng leh Republic Veng inlan ni
A tum khatna tura MBBA buatsaih Inter Veng (LC/VC) chu R. Dengthuama Indoor Stadium, Salem Vengah a ni hnih nan vawiin hian khelh chhunzawm a ni dawn a, veng/khua inelnaa hnuhma nei hrawl ber te zinga mi Saron Veng (MBBA buatsaih leh hriatpui veng/khua inelna tum 20 neih tawha tum hnih champion a, tum thum final lut thei) chuan zanin dar 8 hian tunhnaia Under 23 intihsiaknaa champion Nursery veng an hmachhawn dawn a, inkhel hmuhnawm fal bik a ni ang.
MSL club nei Saron veng tan hian an hranghlui player-te’n record tha bik an lo hnutchhiah hi Biakmuana leh Rinate ho tan hian chona petu a nih a rinawm; chutih rualin, tunhnaia Mizo basketball player hmuhnawm ber zinga mi, U 23 tournament hlawhtling taka nei zawh taka MVP ni thei Emmanuel-a (ani hi a hliam avangin MBBA Season opening a khel lo) hi Nursery veng tana a rawn inlan leh inlan loh inkar hi team pahnihte inkhel result danglam theihna a ni!
Nursery vengah hian rawlthar chawrno leh beiseiawm tak tak an tam a, thlawptu mipui ngah veng ni bawk hian khuangpui nen an hlachuam ‘Nursery London boys’ tih kha an sak leh dual dual a rinawm.
Football lamah Inter Village, 2025 champion zo hlim an ni a, he veng Republic veng hian basketball-ah pawh hniak mawm tak hnutchhiah tawhin, an hranghlui player Mamuanate hovin kum 2008 khan Inter Branch YMA tournament-ah nomawi lo chawi tawhin, kum 2005 khan Inter vengh final an lo thleng tawh bawk. Infiamna uar veng an ni, an rual ute sulhnu hi kum 20 liam hnu khumtu an veng thalai awm tak maw?
An match hmasa bera an tumpui tur erawh Mission Vengthlang an ni tlat – basketball indoor stadium nei veng hi lo chik rawh u.
Hoops Mania Timeout
‘Make my old memories come alive… sing me back home before I die’ tia Don Williams a’n kur vang vang kha chu aw.
An vanglai, rualhluite nena an veng/khua hmingthat theih nana an theihtawp chhuaha a sur a sa hnuaia an inkhelh thin laite kha ngaiin an sulhnute an thlirlet ang a, Mizoram basketball iptepui bannaa Tuikual South phir unau fam chang ta te inkhel tlan fua fua thleng khan an mitthlaah an lang iar iar ngei ang!
Kum tam liam ta khan champion nomawi chawi emaw chawi lo emaw veng/khua inelna vung vanglaia an chenna khawtlang tana penchhuak zawng zawngte tan Hopps Mania The Aizawl Post chuan nunhlui ngaih lunglen chibai kan buk vek che u.
Hun inher kara thawnthu intawm kan neihte hi tawlh bo hlen kan phal love…
Nimina inkhel result
- College Veng 82-97 Tuikual South
- Thuampui 89-93 Chanmari West
- Khatla East 76-68 ITI Veng
- Tuithiang 60-69 Chanmari
- Luangmual – Chawnpui (Result hre hman lo)
- Vaivakawn – Venghlui (Result hre hman lo)