Darthakunga
-- Advertisement --
September ni 3, 2024 chhuak The Aizawl Post leh Vanglaini chanchinbuah te chuan Lunglei bawrhsap Pu R. Lalthazuala hova Lunglei District chhunga school naupangte sikul ipte (bag) rit lutuk vanga zirlaite’n harsatna an tawh loh nana hmalak dan tur sawihona ka lo chhiar chuan min va tilawm em. Hei hian ka article ziah lai pawh phur takin min ziah chhunzawm tir a, kan tum thuhmun a ni bawka mipui chhiar atan ka han chhawp chhuak ve hrim hrim ang e.
Hmanni chu naupang school kal tur hruai chungchangah buaina tawk chhungkaw pakhat ka nang ching a. Mahnia kal rual an nih tawh kha, kaltir ula niang chu, naupang hi duat tur chu an ni na meuh mai, mahse, duat lutuk hi a awm ve a nia tiin ka lo inrawlh ve a. Naupang pi chuan an school kal kawng hi a chho zawng a ni a, an bag hi a rit em a, kea kal tir chi an ni lo tiin min chhang a. Naupang te bag chu ka han khai chin a, a lo rit hle mai tak a.
Tinge hetiang em em a rit an ah le tiin ka zawt a. Nikhatah period ruk (6) te an nei a, lehkhabu zawng zawngin note book a nei a, diary a awm hrang bawk. Hei bakah hian tui leh tiffin an pai bawk hi a lo ni a, a rit lo thei lo. An bag rihzia ka hriat hnu chuan kea kaltir ziazang an lo ni lo. Zawl emaw a chhuk zawng emaw pawh ni se a rit lulai em mai.
Ni tina an bag pai/ah thin rit lutuk hi zirtirtute leh nu leh pa ten kan ennawn a tul hle a ni. Elementary Schools te tan Sorkar dan dinglaiah chuan Class I leh class II te chuan kg khat(I) leh a chanve aia rit an ak tur a ni lova, class III to class V te chuan school bag kg 2-3 aia rit an ak tur a ni lo, tin, class VI leh class VII pawhin kg li(4) aia rit an ak tur a ni lo bawk. Tin, pawl VIII te pawhin kg li(4) leh a chanve aia rit school bag an ak tur a ni lo, Sorkar dan hi school zawng zawng (sawkar, kohhran leh private) te hian zawm vek thei ila, kan tu leh fate phur rit em em mai hi kan chhawk zangkhai ngei ang.
A chunga pawl (class) hrang hrangte bag rih zawng ah/pai phal chin kan sawi tizangkhaitu atan nikhata period neih tur zat pawh sorkar chuan bithliah fel tak a nei. Class I leh class II te chuan nikhatah lehkhabu (zirlai bu) pathum (3) chin an ak thei a. Class III atanga class V te chuan subject pali(4) (lehkhabu pali) an ak thei bawk a, tin, class VI atanga class X (ten) te chuan subject paruk(6) an ak thei thung. Hei aia tam ah hi DAN chuan a phal lo.
Sawrkar dan siam hi school zawng zawng hian an hre lo nge ni kan hmuh zin ber Aizawla zirlaite hian lehkhabu an ak hnem thei em em a, hei vang hian an school bag hi a rit em em a ni. A bik takin private school te school bag hi a rit bik emaw aw tih tur a ni bawk. Kan tu leh fa ten heti taka school bag an ah rih ni tin chuan an rilru leh taksaah nghawng tha lo a awm ang tih a hlauhawm hle a. Naupang taksa thanglai tan phei chuan a pawi thui thei tih kan hriat a, kawng dang kan dap thuai a tha awm e.
School tin hian mahni school theuhah lehkhabu dahna hi siam ila (School thenkhat chuan an siam). An home work tur chauh in lamah hawn tir ila. Zirlai thiam thei fal deuh in lamah zir belh duh nei an awm chuan chutiang mi erawh a hranpa deuha enkawl ni thei se. |angkai em em lo tur ni tina an ah ziah zawngin tul lovah harsatna kan siam mai a lo ni. Tin, tui thianghlim in tur hi zirlai ten in lam atanga an ken ngai lo hian school tin hian kan zirlaite mamawh tawk tuithianghlim chhawp chhuahsak thei ila chuan bag rit deuh hi kan chhawk zangkhai ngei ang.
Naupangte hi nakina min chawm a, min enkawl a, kan ram hruaitu tur an nih avangin DAN hian a duat hle a. An kum, rilru leh taksa mil zela enkawl leh kaihhruai pawh min phut a. School kal rual phei chu school kal vek turin a ti nghe nghe. In lam a ni emaw zirna school lam a ni emaw theihtawp chhuaha enkawl min phut vek a ni. An rilru leh taksa ti na zawnga an chunga thahnem ngaih lutuk pawh DAN chuan a phal lo a ni tih kan hriat a tul ta hle a ni.
Lunglei District bawrhsap hmalakna hi a fakawm hle a. |hutkhawm tuma an thu relte pawh a taka zawm nghal turah beisei ila. District dang pawh hian hma han la chur chur se a duhawm hle a ni. Vawiina kan tu leh fate hi nakina min chawma min enkawl a, kan ram hruaitu tur te an nih avangin an vawiin hun hman mek hi uluk taka kan enkawl a ngai a. An rilru leh taksa than tithu zawng awm thei apiang chu kan thenfai sak zung zung hi a tul hle a ni.