Paris 2024 Olympics-ah Brazil kan hmu dawn lo

Defending champion Brazil chu Argentina lakah sikhat faiin an tlawm a, kumin men’s Olympic football tourna-ment-ah an title kawl lai humhim turin an inlan ve thei dawn lo.
Paris 2024 mipa football inelna kan thlir tur hi khel pha leh ta se Brazil tan a zawna gold medal vawithum an beiseina tur a ni a, mahse, an hmelma lian Argentina an ngam loh avangin kum 2004 hnu lama a vawikhatna atan he tournament hi an khel pha dawn ta lo a ni.
France rama nipui Olympic mipa football khel tur zawnna South American qualifying tournament-ah Pathianni zan khan Brazil leh Argentina inhmachhawnin, he inkhela goal lut awmchhun leh sikhat faia Argentina Under-23 team chakna goal awmchhun hi second half minute 70-a Luciano Gondou tihluh a ni.
Kum 2004 leh 2008 champion Argentina hian point nga hmu chungin qualifying hmawr an bawk a; Olympic men’s football medal vawili la tling tawh Brazil erawh point thum hmu chungin an tlang zo ta lo.
Pathianni inkhel dangah sihnih faia Venezuela hnehtu Paraguay pawh Paris 2024-a inlan turin South America atangin an tling a, CONMEBOL Pre-Olympic Tournament 2024-a point hmu hnem ber niin an champion nghal.
Final group stage table-ah Paraguay U-23 team hian khelh thum atangin point sarih an hlawhchhuak a, vawihnih chaka draw vawikhat neiin point hmu sang ber an ni.
Tarlan tak angin, Argentina U-23 team chuan point nga nen table-ah pahnihna luahin kumin Paris tournament an khel pha dawn a; vawithum khelhah vawikhat chakin, draw vawihnih an nei.
Pathumna luahtu Brazil hi vawikhat chakin, vawihnih an tlawm a; a mawng-phah Venezuela chuan draw vawikhat neiin, vawihnih an tlawm thung.