Car chesualah Marathon world record Kiptum a thi

Chicago khawpuia Eliud Kipchoge kawl lai men’s marathon world record chhuhsaktu Kenyan runner Kelvin Kiptum chu Pathianni khan an rama motor accident-ah a thi.
Kum 24 mi Kiptum hi Kenya ram khawthlang lama a car khalh che-sualah thiin, a hmunah hian a coach chhawr lai Rwanda mi Gervais Hakizimana pawh a thi tel a, an hmeichhe phurh pakhat erawh damdawi in lama enkawl a ni.
Kiptum hi nikum khan tlankawngah ropui taka inlanin, a chipui leh marathon runner ropuiberte zinga mi ni bawk Kipchoge kut atangin record a chhuhsak a; October thla Chicago intlansiakah Kiptum hian darkar hnih leh minute 35 chhunga mel 26.1 (42km) tlan chhuak hmanin, heti zat tlankawng zawh zo tura Kipchoge hun hman aia rei lo zawk nen record thar a siam a; Kenya pawhin an pahnih hian kumin Paris Olympics-a marathon team la nemngheh leh tur atan an dah a, Kiptum hi a inlan ve thei dawn ta lo a ni.
Kenyan Sports Minister Ababu Namwamba bakah Kenya opposition leader leh an prime minister hlui ni bawk Raila Odinga bakah World Athletics president Sebastian Coe-te’n Kelvin Kiptum uina leh sunna thu an tichhuak.