Paris leilungah Swiatek ropui zel

Poland nula Iga Swiatek chuan Parisian clay-a a chungnunna chhawm-nung zelin Inrinna zanah kum li chhunga a vawithumna atan French Open title a sualchhuak leh a, final-a a khingpui unseeded Czech Karolina Muchova lakah 6-2 5-7 6-4 hnehna changin, a career-a Grand Slam title pali a lakna chiah a ni.
Nikum April thlaa world number one a nih hnu khan Swiatek hian tlakhniam em em nei loin a tennis zinkawng a zawh a, ranking ler a luah hnua Grand Slam match 26 a khelhah vawihnih chiah tlawmin, kum 1990-92 champion Monica Seles hnu lamah kum 22 mi Pole hi Roland Garros-a trophy la zawn leh thei hmasaber a ni.
Hnehna a chan hnua an kawmnaah Swiatek hian a tumpui Karolina lawm-puina chhakchhuak hmasaberin, inkhel hautak a ni dawn tih a hre lawk tih a sawi a, final dang tam tak a la hmachhawn zui zel a beisei thu a hrilh.
Top seed hian French Open hautakzia tarlang zuiin, chawlhkar hnih taltap tournament khelh chu hautak a tih thu leh chutih chhung zawnga thlawp tlattu a chhungte bakah Poland atanga a inkhel tawiawm tura thawkchhuakte chungah lawmthu a sawi a, Paris clay chu a khelmual ngainat a nih thu a tarlang tel.
Court Philippe Chatrier-a hmeichhe singles final-ah world number 43 Mucho-va kha set hnihnaah insiamthain set a la hial a, mahse, kum 26 mi Czech hian he hmuna vawihnih champion tawh lakah hnehna tluantling a sualchhuak zo lo.
Paris-a vawithum champion tling Swiatek hian modern day three-time champion pathum Serena Williams, Monica Seles leh Arantxa Sanchez Vicario-te hnung a zui ve ta chiah a ni.
March 2022-a world number one hlui Ashleigh Barty chawlh lai khan hmeichhe tennis-ah hmunawl zau tak a hnutchhiah a, tu takin a kalsan hmunruak kha luah ang maw tia ngaihtuahna a kal mek laiin kum 2020 maia tleirawl hriat hlawh lo la ni Swiatek a lo lang a, Barty boruak rawn chhunzawmtu a ni zui ta a ni.
Kumin hian player hraw leh huhang ngah dang Belarus star Aryna Sabalenka leh Kazakstan nula Elena Rybakina-te nen thawm an nei lian a, hmeichhe tennis-ah ‘big three’ thar tih tawngkam a lo chhuak ta hial a, an zinga langsar ber Swiatek chuan Roland Garros a rawn thunun chhunzawm leh mek a ni.
French Open inbuatsaihna Rome khaw tournament-ah khan malpui hliamin tibuai mah se Paris clay-ah Pole a dam hman a; semi-final pakhata a hmachhawn theih tur Rybakina chu tournament stage tir lamah damlohna avangin a inhnuk-dawk a, Swiatek tan final kawng a insial zau sawta ngaih niin, semi-final lehlamah Muchova chuan rin loh takin Sabalenka a rawn hneh nawlh a, beisei loh final (Swiate vs Muchova) kan thlir a nih kha.
2021 Australian Open semi-final hial lo khel ve tawh Czech player fing zet Muchova kha a career-ah hliam neuh neuhin a tibuai ve fo a, chu chuan a nih tur ang a thlentir zo loa ngaih a ni.