Paris Olympics: India dinhmun hmasa

Inrinni khan Paris khawpuia Olympic Games 2024 chu official-a tan niin, a ni khatnaah Indian young shooter Manu Bhaker chuan Paris Olympic kal laia India medal beiseina hmasaber a hungchhuak a, 10m women’s air pistol final lutin, a dinhmun hnuhnungber tarlan hman a ni lo.
Kum 22 mi Haryana shooter Bhaker hian total score 580 neiin qualification -ah pathumna a hauh a, final lutin, he intihsiaka Indian shooter inlan dang Rhythm Sangwan chu 15-na niin a tla.
Sarabjot Singh leh Arjun Singh Cheema pawhin men’s 10m air pistol final an lut zo lo a, 10m air rifle mixed team lamah pawh eng an ang zui ta chuang lo.
HOCKEY
Skipper Harmanpreet Singh chuan hun tawp dawnah penalty stroke thunin Olympics men’s hockey tournament bul an tanna inkhelah 3-2-in New Zealand an hneh hram.
New Zealand hian penalty-corner hmasaber goal-a chantirtu Sam Lane-a goal hmangin minute riatna lekah hma an hruai a, India beilet tan minute 28-ah Mandeep Singh chuan an siphurh a sut a, Vivek Sagar Prasad chuan third quarter-ah hmahruaina goal a thawh zui.
New Zealand lamin an siphurh sut ve bawk mah se Harmanpreet Singh chuan India chakna goal a thun a, vawiinah India hian an Pool B match hnihnaah team khawng dang Argentina an su zui leh ang.
Inkhel dangah Germany chuan 8-2 tehrengin mualneitu France an sawp a, Pool A hma an hruai.
South Africa pawhin hockey palian Netherlands an chhaihbuai a, Group A match dangah tum li ngawt hmahruaitu zawk ni chungin Dutch team-in goal thum lai an chhuah a, 5-3 hnehna nen bul an tan.
Pool A inkhel dangah second-ranked Britain chuan 4-0-in Spain an sawp a; Pool B reigning champions Belgium pawhin Tokyo Games-a tel pha lo Ireland team lakah 2-0 hnehna changin, he thu buatsaih lai thlenga inkhel hautak leh inhnehtawk berah Australia chuan sikhat faiin Argentina an hneh hram.
Men’s Pool A lamah goal goal 22 zet a luh tawh laiin Pool B lamah erawh goal riat chiah a la lut thung.
BOXING
Preeti Pawar chuan women’s 54kg category first round bout-a Vietnam mi Vo Thi Kim Anh hnehin pre-quarter-final a lut.
Asian Games bronze medallist Preeti hian a debut Olympic Games-ah first round khel tha lo mah se Haryana boxer kum 20 mi hi Vietnamese lakah a insiamtha a, second seed leh World championships silver-medallist Marcela Yeni Arias of Colombianen naktuk hian round of 16 lamah an innuai chhunzawm ang.
ROWING
Paris-a Indian rower hmuh tur awmchhun Balraj Panwar chuan men’s singles scull competition heat 1-a palina luah chungin ‘repechages’ a thleng a, heat tina a sang pathumin quarter-final an luh dawn avangin kum 25 mi Panwar hian hmabak hautak a la nei a, he thu buatsaih lai hian round sang zawk a luh leh luh loh tarlan hman a ni lo.
Heat 1-ah khan 7:07.11 hun hmangin, a hmaah New Zealand lawngkar mi Thomas Mackintosh (6:55.92), Stefanos Ntouskos (7:01.79) leh Abdelkhalek Elbanna (7:05.06) an thleng.
Repechages-ah hian Panwar chuan semi-final emaw final emaw thleng thei turin chance hnihna a nei.
BADMINTON
India gold beiseina lian pakhat two-time Olympic medallist Indian shuttler PV Sindhu chuan nimin khan straight games hnehna nen Paris Olympics campaign a tan a, Maldives aiawh Fathimath Abdul Razzaq chu women’s singles group stage match pakhatah 21-9, 21-6-a sawpin Olympic medal pathumna tur a beisei bultannaah harsatna lian a tawk lo.
Group M fixture-a hnehna chang turin Sindhu hian minute 29 chiah a mamawh a, world number 111 Fathimath tan world champion hlui kha a lian mah mah deuh!
World No 13 leh Paris-a 10th seeded ni bawk Indian star shuttler hian Rio Games 2016-ah khan silver medal awrhin, Olympic hnuhnungber Tokyo-ah khan bronze a dawng leh a, a gold hmasaber tur a beiseina kal zelah Nilaini hian World No 75 Kristin Kuuba of Estonia a tum leh ang.
Sindhu hi tunhnai thla engemawzat chhung khan legendary Prakash Padukone nen an thawkdun a, kha kha a hlawkpui mek tih a sawi.
Porte de La Chapelle Arena hmuna badminton competition inkhel dangah men’s doubles pair Satwiksairaj Rankireddy leh Chirag Shetty tangdun pawhin nuamsain an group stage men’s doubles match hmasaberah hnehna an chang.
Third-seeded pair leh reigning Asian Games champion ni mek Satwik leh Chirag inkawp hian an Group C match hmasaberah 21-17, 21-14-in French pair Lucas Corvee leh Ronan Labar an hneh a, vawiin hian German pair Mark Lamsfuss leh Marvin Seidel inkawp an tum zui leh ang.
India medal beiseina dang Lakshya Sen pawhin Olympic campaign-a a chak vawikhatna nghakchhuakin, Group L men’s singles badminton match pakhatah Tokyo Games semi-finalist le reigning Pan American champion ni bawk Kevin Cordon of Guatemala chu 21-8, 22-20-in a hneh.
2022 Commonwealth Games gold medallist leh 2021 World Championship bronze winner ni bawk Sen-a hian vawiinah world No. 52 Julien Carraggi of Belgium a tum leh dawn a, a chak zel chuan Indonesian world number 3 Jonatan Christie nena insutna chance a awm dawn!
Women’s doubles Group C match-ah Ashwini Ponnappa leh Tanisha Crasto inkawp erawh South Korean pair Kim So Yeong leh Kong Hee Yong chuan first round-ah 18-21, 10-21-in an hneh thung.
TABLE TENNIS
Nimin khan Indian table tennis veteran Achanta Sharath Kamal chu Paris Olympics men’s singles competition bul a tanna inkhelah tlawmin, star woman player Manika Batra erawh round of 64 match-ah nuamsain a chak thung.
A tumngana atana Olympic-a inlan Sharath Kamal hi amah aia ranking lama pen 86 zeta hniam Deni Kozul of Slovenia chuan 12-10, 9-11, 6-11, 7-11, 11-8, 10-12-in a hneh a, kum 42 mi Indian tan player tha za zawk khin chu a khirh ve ta deuh niin a lang!
Commonwealth Games champion Kamal hi world ranking-ah 40-na niin, a hneh loh kha 126-na a ni thung.
Round of 64 women’s singles match-ah kum 29 laia upa ni ve tawh Manika thung chuan Anna Hursey of Great Britain lakah harsatna lian a tawk lo a, Tokyo Olympic-a thlen chin thlengin, Indian women’s table tennis player zinga Olympic round of 32 singles thleng thei hmasaber a ni.
Manika hian July ni 31 hian round of 32 match-ah 12th seed Prithika Pavade of France a tum leh ang.
Nimin vek khan India top-ranked woman paddler Sreeja Akula pawhin round of 32 thleng turin Sweden player Christina Kallberg lakah 4-0 hnehna a chang a, Indian zinga WTT Contender singles title la thei hmasaber hian 11-4, 11-9, 11-7, 11-8-in Swede a paltlang.
Harmeet Desai pawhin a Olympic debut match-ah hnehna changin men’s singles second round a lut a, chu hmun thleng tur chuan Jordan aiawh Zaid Abo Yaman lakah 4-0 hnehna a sualchhuak ve bawk.