Tunhnaia Myanmar sipai indo thlawhnaten Mizoram/ India ram chhunga bomb an thlak chungchang Parliament House-a sawichhuah a tumna chu remtih sak a ni lo tih MP K Vanlalvena chuan a sawi.
-- Advertisement --
Rajya Sabha MP hian kumin January 10 & 11 a Myanmar rama buaina kaihhnawiha Mizoram leh Myanmar inrina bul, Farkawn khaw ram bula CNA Camp, Myanmar sipai indo thlawhna in bomb hmanga an beih chungchangah international law bawhchhiatna leh Mizoram mipui himna tihderthawn ni ngeia a lan avangin Parliament House hriattir tula hria in, Parliament Session kal mekah February 10 khan ‘Zero Hour’ a sawi chhuah a dilna chu phalsak a ni lo tih a sawi.
Special Mention Notice pe in February 13-a Session-a sawichhuah dilna a thehlut leh a. Hei pawh hi phal a nih loh thu ziakin Rajya Sabha Secretariat lam chuan February 12 (Pathianni) khan Delhi-a a chenna inah lehkha an rawn pe leh tih a sawi bawk. Sawichhuah phalsak a nih loh chhana tanchhan hi ‘180B of the Rules of Procedure and Conduct of Business in the Council od States’ hnuaiah a ni tih ziah a ni.