President Droupadi Murmu chuan India chu ‘hlauh nei lo, tum mumal tak nei sorkar a ni’ tiin parliament budget session hawnnaa thusawina a neihah a sawi.
-- Advertisement --
“Ka sorkarin kum kua dawn a hman tawhah, India mipuite chuan a tum khat nan thil tha lama inthlakna tam tak an hmu a ni. A danglamna lian ber chu vawiin hian India inrintawkna chuan a vanglai tawng mekin khawvelin India inthlak danglam lam a hawi mek a ni. India harsatna chinfel nana ramdangte rawn thin chu vawiinah chuan khawvelin harsatna a tawha chingfel tura chhanna petuah a tang tawh zawk a ni,” tiin President Murmu chuan a sawi.
“Vawiin hian India chuan sorkar nghet, hlauh nei lo, tum mumal neia suangtuahna te tihlawhtling tur sorkar a nei a ni. Vawiin hian India in sorkar rinawm te dah sanga mirethei leh harsatna sukianga tihchak hlen duh sorkar a nei a ni,” tiin a sawi bawk.
President Murmu chuan, “Amrit Kaal”, sorkarin India independence kum 100 thlen hmaa kum 25 pawimawh a tih chu aatmanirbhar (self-reliant) India nih tir hman leh humanitarian lama a tum te tihlawhtling hman tura hmalak chak hun a ni a ti bawk a.
Sorkar chuan ram tana tha ber tura thutlukna siamin a tul dan azirin policy leh strategy te a siam danglam mai tiin President chuan a sawi a, “Surgical strike atanga firfiakna hmehmih tura hmalakna te, Line of Control atanga Line of Actual Control thlengin, Article 370 atanga Triple talaq nuaibo thlengin, ka sorkar hian mumal takin chet a la a ni,” tiin a sawi bawk.
“Ka sorkar hi a chiang a- eirukna hi democracy leh social justice hmelma lian ber a ni a. Rinawm ten zah an kai theih nan hma kan la a. A hma pawhin eirukna tihtawp a nih theih nan hmalak thin a ni,” tiin President Murmu chuan a sawi a.
Sorkar chuan ‘sal tanna tin reng phelh tumin hma a la’ tia sawi bawkin chumi entirna chu Rajpath pawh Kartavya Path tia thlak a ni a ti bawk.
Odisha chhuak president hian Odiya poestess leh freedom fighter Kuntala Kumari Sabat in a poem ziah, “India hmeichhia te hi midang te nena khaikhinin an chak lo emaw nep bik lo. A ropuina te chu kum tam takah pawh theihnghilh a ni lovanga khawvelah a nung reng ang” tih chu a chhiar chhuak a ni.
Prime Minister Narendra Modi chuan President Murmu-in joint sitting of parliament-a a thusawi vawikhatna a nih thu a sawi a. “President’s speech hi Constitution of India chhuanna a ni a, India parliamentary system chhuanawmna leh hmeichhiate zahna hun remchang bakah he ram tribal tradition ropuina tarlanna a ni,” tiin a sawi.
Finance Minister Nirmala Sitharaman chuan Nilaini hian Budget a pharh dawn a. Budget session thawhkhatna hi February 13-ah a tawp ang a, a thawh hnihna chu March 13 ah tan leh ni dawnin April 6-ah a tawp ang.