Parliament Budget Session chu mumal takin a kal hleithei meuh lo va. Nimin khan Lower House lamah Union Health Minister Mansukh L. Mandaviya an DMK MP T.R. Baalu an medical college din vel chungchanga zawhna a chhannaah lungawilohna a thleng a, Congress leh DMK member-te chuan Mandaviya chhanna hi duh lovin House an chhuah tauhsan a ni.
-- Advertisement --
Rajya Sabha-ah pawh thil a pangngai lo zui zel a, Opposition member te chuan eng vanga Rule 267 hnuaia notice an pek chu Chairman Jagdeep Dhankhar an a hnawl zel tiin sawifiahna an phut a. Ruling lam member te chuan a hma nia Leader of Opposition Mallikarjun Kharge an Prime Minister Narendra Modi a thusawi laia an lo au el avangin ngaihdam dil turin an phut bawk a. A hnuah Opposition member te chu an chhuak tau bawk.
Ningani khan PM Modi chuan Rajya Sabha-ah opposition te chu na taka beiin amah leh a sorkar puhna tinah mawhphurhna lak a inring reng thu a sawi a. Mahse, Adani Group te nena an inzawmna an puhna leh Hindenburg report-a sorkarin ngawih a chuh tlat chungchang chu a sawi duh miah lo thung a. PM Modi-an President Droupadi Murmu ‘Motion of Thanks’ address a debate a chhan chhung zawngin Opposition lam ten an auel a ni.
Adani Group chungchang chuan kumin Budget Session chu a luahkhat a ni hawt a, opposition te chuan Adani Group te chu joint parliamentart committee emaw Supreme Court kaihhruaia chhui chianna neih an la ngiat reng a. Tun session hi April 6 thlenga neih tur niin sitting 27 awm tura duan a ni.
Congress MP Adhir Ranjan Chowdhury chuan Congress leader Rahul Gandhi-an PM Narendra Modi chungchang a sawi nuaibo a ni chu an duhloh thu sawiin Rahul chuan Hindenburg report behchhana sawi a ni a ti a.
“Article 105 chuan Parliament ah thlifim hauh lova kan ngaihdan kan sawi a remti a ni. Vanduaithlak takin, Rahul Gandhi thlir dan chu dik lo taka laksak a ni a. Rahul Gandhi-an tute lakah mah phuba lakna rilru a pu lo” tiin Chowdhary chuan a sawi a.
“Hei hi Parliament thar nia hriatna ka nei a…media luh an phal lo va, Opposition te thuswi an remti lo bawk a. Parliament pawh hi a tawp mai dawna ngaihna ka nei hial,” tiin Congress leader chuan a sawi bawk.