Parliament House-a kha chi tlat lo tur candidate kan nei – Lalduhoma

Parliament House chhung leh central minister dawr kawnga kha chi tlat lo tur, state sawrkara nena thawk ho tha thei tur MP neih a pawimawh tih chief minister Lalduhoma chuan a sawi.
Thawhtannia an party office-a inkhawmah ZPM leader ni bawk Lalduhoma chuan, ram hruai kawngah leh thiamna lama pi leh pu atanga chhungkaw belhchian dawl tak MP candidate an nei chu an vannei hle tih a sawi a. Mizoramin MP fel tak tak a lo nei tawh thinah tawng lama harsatna nei, Parliament House chhunga kha chih tlat, central minister-te dawr kawnga harsatna nei pawh an lo awm tawh thin, tiin, chutiang ngaihtuah chuan ZPM candidate chu MP tha tak a nih a beisei a, ram rawngbawlna kawngah theihtawpa ke pen tur leh budget piahlama central sawrkar hnuaia scheme tha tak tak hai chhuak thei turin an ringtawk tih a sawi.
“ZPM hi tualto party kan nih angin vanneihna bik kan nei a, central sawrkarah zawm bik kan neih loh avangin tuma’n kan kut min phuarsak ve dawn lo. A thu azira central sawrkar thlawp theitu leh dodal theitu party kan ni a, hei vang hian central sawrkar pawhin min ngaipawimawh a, vawiin thlengin min thawhpui tha em em a ni. Mizoram mipuiin kan MP candidate min vote pui turin kan sawm a, ruling party mi MP kan neih chuan, Mizoram sawrkar nen pawh hmasawnna kawngah thawhho a nuamin thil tih a awlsam dawn a ni,” a ti.
Sawrkar hmasa hnuaia contract hna thawh chungchang Lalduhoma hian sawiin, “Hna zawh hun tawh, la zawh loh tam tak a awm a, hna thenkhat contract semsawm lutuk avanga hna chhe tak tak hmuh tur a awm nual bawk. Heng hna thalo te pho chhuaka thuneitute beng a thlen theih nana min thawhpui zel turin mipui leh NGO kan sawm a, tunhnaia video viral chungchangah pawh Vaisam YMA hruaitu pakhat thahnemngaihna azarah thuneitute beng a thleng a, a chungah kan lawm hle,” a ti.