Parliament rorel hleithei lovin awm zui zel

Congress leader Rahul Gandhi Lok Sabha atanga ban a nihna leh Opposition tena Adai stock issue Joint parliamentary Committee (JPC) chhui chian an ngiatna avangin parliament chu Thawhlehni khan rorel mumal thei lova siamin a awm a.
Lok Sabha chu tan a nih phat hnuah tihtawp zui nghal niin chhun dar 2 a tan a nih leh hnuah pawh rorel thei lova siam zui niin tihtawp a ni nghal a. Rajya Sabha pawhin chutiang tho chu tawngin Nilaini March 28 chawhma dar 11 tan leh tura tihtawp zui a ni.
Thawhtanni lam khan Rajya Sabha chuan money bill thenkhatte an pawm a, a then te chu sawihona nei lovin Lok Sabha-ah pek let a ni a, chung zingah chuan Jammu and Kashmir Appropriation (No 2) Bill, J&K Appropriation Bill leh Finance Bill, 2023 te pawh a tel.
Rajya Sabha bikah Opposition te chuan Adani issue chhui chiang tura JPC din an ngiat a, buai nuai nuaiin a zui avangin Chair Dhankhar chuan House tan atanga minute 2 lek hnuah a titawp zui nghal a.
Chhun dar 2 a tan a nih leh hnuah Vice President Jagdeep Dhankhar chuan Business Advisory Committee chuan The Competition Amendment Bill, 2022 leh Interservices Organisations (Command, Control and Discipline Bill), 2022 chu sawiho tura a chhawpchhuah thu a sawi a. Hei bakah hian Business Advisrory Committee chuan lungrual takin March 31-ah thutkhawm loh ni se a tih thu a sawi bawk a, eng vang nge tia member te zawhna chu Chair chuan a chhang zui duh lo thung.
Lok Sabha-ah pawh tan a nih veleh Opposition member te chuan House Well ah pungkhawmin ‘Save Democracy’ tih placard kengin an aurual nghal bawk a. Hei vang hian rorelna kalpui theih loha a awm zui zel avangin a tuka chhunzawm tura tihtawp zui a ni.
Parliament session thawh hnihna chu rorel mumal hleih theih lohin siam zui zel a la ni a. Opposition tena Adani issue chhui chian an phut vang leh BJP tena Rahul Gandhi chu ngaihdam dil tura an ngiat vang a ni ber.