Parliament rorel thei lova siamin awm zui zel

Nimin khan Parliament House pahnih chu BJP leh Opposition member te in auel leh bengchheng siam avangin rorel thei lova siamin a awm a, minute kaht lek pawh House mumalin a awm lo va. Zing lamah rorelna tihtawp lailawk niin chawhnu dar 2 a tan lehah pawh tan hnu reiloteah tihtawp zui nghal a ni.
Congress te chuan Modi sorkar chuan Opposition tena Adani issue joint Parliamentary probe an remti lo tia an sawi laiin ruling BJP lam chuan Rahul Gandhi chu London-a Indian democracy a sawt vangin ngaihdam dil turin an phut ve thung.
Budget session thawh hnihna hi thawhtanni khan thlakhat chhung budget paper te zirchianna hun inpek hnuah chhunzawm leh a ni.
Congress MP Ranjit Ranjan chuan business dah tha riha Adan issue sawiho a ngiat a. Rule 267 behchhan notice a pekah Ranjan chuan, “Sorkar chuan corporate fraud, political corruption, stock manipulation leh financial mismanagement Adani group tena an kalpui chhui chiang tura Joint Parliamentary Committee te chhuichian a rem ti lo,” tiin a sawi a.
Congress MP dang Syed Naseer Hussain chuan Rule 267 behchhana notice dang pe in India ramah ‘freedom of speech leh expression a tlahniam’ a ti bawk.
TMC MP te chuan House chhungah sorkar laipui chu censorship kalpui nasa tia sawiin treasury bench te chu rorelna kalpui thei lova siamah puhin hmaituamna dum an hreng bawk a.
Rahul Gandhi chuan Parliament a pannaa an kawmnaah anti-India hawi thusawi a neih loh thu a sawi thung a. “Anti-India speech ka sawi lo,” tiin Rahul Gandhi chuan a sawi.
BJP tena foreign ramah India hmusit zawngin a tawng tia an puhna chungchangah Congress MP chuan, “An remti a nih chuan House chhungah ka tawng ang,” tiin a sawi bawk a. Ngaihdam a dil dawn em tia an zawhna chu nui ringawtin a chhang a ni.
Union Minister thahnem tak te chuan Rahul Gandhi chu UK a thusawi avangin ram pum huapa ngaihdam dil turin an phut thu an sawi a.
“He rama tawng hnem ber a ni a, chhun leh zanah sorkar a sawisel reng a, ram pawnah India ramah a duh ang sawi turin zalenna a nei lo tiin a sawi zui leh a ni,” tiin Union Law Minister Kiren Rijiju chuan a sawi a.
“Rahul Gandhi hian Congress a pilpui ang a, engahmah an ngai lo. Mahse, ram tihchhiat a tum a nih chuan khua leh tui kan nihna angin kan ngawi reng thei lo. Ramin Congress leadership a hnawl avang ringawtin ram pawnah ram hmel a tichhe tur tihna a ni lo,” tiin Rijiju chuan a sawi bawk a.
Law Minister chuan Rahul Gandhi chuan anti-India forces tawngkam a hmang tia sawi bawkin, “MP a nihna anga parliament zahawmna a tihniam hi a pawi ani. Anti-Idia forces te chu an au duhdan a inang vek a Anti-India gang member te hi an thusawi pawh a inang a. Rahul Gandhi sawi ang apiang an sawi nawn thin,” tiin Rijiju chuan a sawi bawk.
Congress te chuan Rahul Gandhi chuan ngaihdam a dil dawn loh thu sawi chiang thungin, Prime Minister Narendra Modi chuan ram pawnah Congress te chu a bei fo an ti bawk a.
“Rahul Gandhi ngaihdam dil phutte hian Modiji-an ram panga-paruk a tlawh a, India timualphova India-a pian chu sual a ni a tihah ngaihdam dil tir rawh se. Chung mite tho chuan a nia tunah freedom of expression chep taka siam mek ni” tiin Congress President Kharge chuan a sawi.
Rahul Gandhi chuan UK a thusawina a neihah, “Mi tinin an hria a, chanchintharah a lang renga Indian democracy chuan beih a tawk mek a ni. Opposition leader ka ni a, Democracy in a mamawh institutional framework chu parliament, free press leh judiciary te a ni a. Chungte chuan beih tawk mekin Indian democracy basic structure chuan beih a tawk mek a ni,” tiin a sawi.