Parliament rorel thei lovin siam zel

Congress te chuan Parliament rorel hlei thei lova a awm chhan chu Modi sorkar-in Opposition te ngiata Adani issue Joint Parliamentary Committee (JPC) probe an remtih duh loh vang a ni tiin an sawi.
Congress leader Rahul Gandhi chuan Modi sorkar chu a foreign policy kalpui danah nasa taka sawiselin chung te chu Adani Group tena hlawkna an neih phah theihna tura tih vek a ti a.
“India foreign policy hian Adani chu hausa zawkin a siam em? Tun hnai kum kua chhungin Modiji chuan India chu a kaihruai sual tawh a, Adani chuan Modi chu khawvel hmun tinah a zui a ni,” tiin Rahul Gandhi chuan a sawi.
Congress te puhna chungchangah Union Minister Giriraj Singh chuan, “Adani chuan chiang takin amah pui hmasa bertu chu Congress CM Chimanbhai Patel a ni a, apahnihna chu Rajiv Gandhi a ni a ti a. Adani hian hmasawnna nei a nih chuan midangte ni lovin Congress rorel lai vekin a ni ang,” tia sawiin, Opposition te thil demand chu issue tling lo tia sawiin, “Adani-Ambani hi chhuanlam mai mai a ni, Modi diriam an tumna vek,” tiin a sawi bawk.
“Congress kum 10 chhung rorelna kha buainain a khat a, Modi sorkar erawh beiseinain a khat a, chenna In, toilet, Ujwala, tuia khat niin chung boruak te chu tihtawp an duh vang a ni ber,” tiin BJP leader chuan a sawi.
Thawhlehni khan Parliament chu rorel thei lova siama awmin ruling party chuan Rahul Gandhi chu ram pawna a kalnaa India a sawi danah ngaihdam dil turin an phut a, chutih laiin Opposition te chuan Adani issue chhui chiang tura JPC din an ngiat ve thung.
“Modi sorkarin Opposition tangrual tena PM nena inzawmna nei Adani ‘MagaMegaScam’ chhui chian an phutna an remtih loh avangin Parliament rorel thei lova siamin a awm a ni” tiin Congress general secretary Jairam Ramesh chuan a sawi.
Ahmain party 16 intel khawm Congress, DMK, CPI-M, JDU, RJD, NCP, SP, SS (Uddhav), AAP, CPI, JMM, MDMK, NC, leh Kerala Congress te pawh telna chuan Adani Group te chungchang chu House-ah sawilan an remti tlang a ni.