Party dang thik tham Sports minister kan nei – MNF

Party dang thik tham
Sports minister kan nei – MNF
Sports minister Robert Romawia Royte chu a chet that em avang leh mite mak tih khawpa sports hmasawnna’n hna a thawh avangin opposition-ten thu belhchian dawl lo leh rinthu hmangin an beih chiam thin tih MNF party chuan an sawi.
MNF Media & Publicity department hruaitute chuan hmasawnna kawnga ke penna tura ruhrel tam tak hluitu, a neih ang ang midang tana ui ngailotu minister Robert Romawia Royte chu fakawm an tih thu sawiin, Mizoram tana a ngaihna hretu a nih chhunzawm zel an beisei tih an sawi.
Kum li leh a chanve chhunga sports infrastructure dinna’na Sports & Youth Services department-in sum a dehchhuah, sawrkar laipui atanga an haichhuah a tam hle tih sawiin, detailed project report tam tak siam a nih avang leh nachang hre taka a changtu minister leh department-in an umzui avangin mipui mak tih khawpin sports infrastructure ropui tak tak an nei thei tih an sawi a ni.
Mizoram budget pawnlam atanga Sports department sum thawh chhuah tura ruahman chu cheng nuai 2600 vel a nih laiin, cheng nuai 45000 chuang a thawk chhuak tih sawiin, hei hian asset hlu tak tak a siam bakah GST leh labour cess atangin sum tam tak state sawrkar-ah a la chhunglut tih a sawi bawk.