Party-ten chhiatna thleng pawi ti Tha bakah leh sum leh paiin pui

Political party hrang hrang chuan ruahsur avanga Thawhlehni zinga chhiatna thleng leh nunna chan an awm chu pawi an tih thu an sawi a. Hnatlang tha bakah sum leh paiin chhiatna tawk chhungkua leh khawtlang an pui.
Aizawl East-I bialtu MLA, minister Lalthansanga chuan he chhiatna avanga a bial Zemabawka thite chu puanin a tuam a. Lungleia Council of Minister thukhawma a thangbo lai a nih avangin a aiawhin Aizawl East-1 ZPM Block hruaitute chu chhiat tawhna hmunah kalin YMA hnenah silpoulin leh thil tula hman atan sumfai an hlan a ni.
BJP Mizoram chuan kuminah ruahsur avanga chhiatna hrang hrang, abikin Aizawl leh a chhehvelah in leh lo chan tam tak an awm bakah nunna chan kan awm zel chu pawi a tih thu a sawi. Mizoram sawrkarin chhiat tawkte leh nunna chan tanpuina a pek theih ang ang rang taka pe a, bat sak tawh lo turin a ngen tih sawiin, khuarel chhiatna chu politics-a thangthat lak nan tu party mahin hman tum loin, Mizo kan nih anga kan tih tur ti theuh zawk turin an ngen tih a sawi bawk. ‘Sawrkarin khuarel chhiatnaa chhawmdawlna atan cheng vaibelchhe 15 a dah kha chhiat tawk mangang taka awmte beiseina tibo loa, hmang nghal mai turin kan phut a ni,’ a ti.
BJP Mizoram hian chhiatna thlenna hmun hrang hrang tlawhkualin khawtlang hruaitute hnenah silpaulin an hlan a ni.
MNF Thalai Hqrs. chuan ruahsur nasa avanga chhiatna thleng nasa leh thihna hialthleng chu a pawi an tiin, an tuarpui takzet tih a sawi a. Tanpui ngaite tanpuia hlauhawm kara chhanchhuah hna thawktute an fakawm zia sawiin, vanduaia chungah Mizote vanneih zia a lang thar leh tih a sawi a ni.
Thawhlehni zinga chhiat tawh thu an hriat veleh MNF MLA pahnih – Pu Lalchhandama Ralte leh Pu Robert Romawia Royte bakah Aizawl mayor Pu Lalrinenga Sailo, deputy mayor Pu R Thanglura, AMC executive corporator B Lalawmpuii leh Pu R Zonunsanga bakah bialtu AMC corporator Pu Vanlalneiha ten a hmun rang taka thlengin tanpuina sumfai leh silpaline an pe tih a sawi a ni.
ZPM Thalai Hqrs. chuan ruahsur nasa in chhiatna a thlen avanga nunna chan an awm chu pawi a tiin an lainat takzet a, an chhungte a tawrhpui tih a sawi. ;Heng chhiatna thleng avanga chenna in chhia bakah in hmun, huan lo ram chan phah an awm hi pawi kan tihpuiin kan tawrhpui a. Khuarel chhiatna kan tawh karah mihringin kan insiamchawp avanga harsatna kan tawh thin hmuh tur a awm fo thin hi pawi kan tiin, ram leh hnam khawtlang enkawlnaah mawhphurtuten kan thuneihna zawnah dan leh thupek kenkawh chungchangah tan lak a ngaih zia a tilang a ni,’ a ti.