Pasal thattu nia insawi jail-ah

Pasal thattu nia insawi jail-ah
Lalchhuanawma (39), Mission Vengthlang thihnaa inhnamhnawih ngei nia hriat a nupui Lalremruati chu police-in thu an zawhfiah hnu ah Central Jail-a dah rih a ni.
Thudawn danin, July 27 zing dar 2.00 vel khan Lalchhuanawma hi an chenna inah thia hmuh a ni a, a tirah mahni intihluma ngaih a ni. A ruang dinhmun enchianin a chhungten mahni intihlum nia an rin loh avangin Kulikawn Police Station-ah FIR an thehlut a, police-ten thil awm dan an zirchian hnu ah Lalchhuanawma nupui Lalremruati leh mipa pakhat an man. He mipa hi Lalremruati’n a lo kawp thin nia sawi a ni.
Thu zawhfiahnaah Lalremruati hian amah thah niin a sawi a, midang man pakhat hi chu inhnamhnawihna a neihna tur hriat a ni loa, police hian an chhuah zui a ni.
The Aizawl Post thudawn danin, he thil thlen zan hian an nupa in zu an rui a, an inhnial thinrim laiin Lalremruati hian ‘cable’ in Lalchhuanawma nghawngah a vet bet ta vak mai tih sawi a ni.
He thilah hian police-te chuan midang inhnamhnawih awm an hre lo a, thil thlen dan hi la chhuizui mek a ni.