Pass/land lease dilna thlirho

Pass/land lease dilna thlirho
Kolasib Land Committee chu an chairman, bawrhsap Robert C Lalhmangaiha kaihhruaiin Thawhtanni khan an thukhawm a, house pass leh land lease dilna lut an thlirho.
Committee member secretary, settlement officer Lalvenhimi Ralte chuan quarter tina thukhawm tur an nih laiin, harsatna awm avangin an thukhawm zing thei thin lo tih a sawi a. Tun tumah hian land lease dilna lut 24 leh house pass 37, a vaiin 61 a lut tih a sawi. Land Committee-a ngaihtuah tura chhawpchhuah hi a hmun pawh teh fel vek tawh, surveyor report chhuak deuh vek tawh a ni a, land lease thenkhat erawh kar thar lama report chhuak mai tur a awm tih a sawi a ni.
Settlement officer chuan Land Committee-a ngaihtuah tura chhawpchhuahah hian ram/ inhmun diltute originality ngaihpawimawh tur a ni, tiin, Mizoram khua leh tui ngei an nihna, ram inthuah a awm leh awm loh, development project ti khaihlak thei emaw khawtlang tan harsatna a siam em, tihte ngaihpawimawh a ni tih a sawi bawk.
Thutkhawmah hian dilna lut hrang hrang thlir ho a ni a. Village council-ten an dinhmun an sawichian hnuah dilna lut thenkhat chu pawm a ni a, a then erawh la ennawn leh tura dah a ni.