Patanjali Company-in hralh chhawn turin lei verh a dil lo – Agriculture minister

Patanjali Company-in hralh chhawn turin lei verh a dil lo
– Agriculture minister
Lawngtlai district-a oil palm chingtute leikhawm saktu tur Patanjali Company chuan hralh chhawn turin leihnuai tui verh a dil loa, hei hi an dilna – State Ground Water Authority lam tihsual a ni tih Agriculture minister PC Vanlalruata chuan a sawi.
Patanjali Foods Limited hian an inbunna hmun, Liapha Lawngtlai district-ah leihnuai tui verh a dil a. Hemia thuneitu Mizoram State Ground Water Authority chuan chanchinbu ah ‘advertisement’ tichhuakin, hralh chhawn leh turin lei hnuai tui verh an dil thu leh, an dilna lehkha leh tul dang a thil tel chu enfiah theiha an kawl thu sawiin, mi tu pawhin he an dilna hi phalsak lo tura an duh chhan hria emaw sawisel duh emaw nei chuan he hriattirna chhuah a nih atanga ni 5 chhunga thehlut turin a ti a ni.
Hemi chungchangah hian environmental activist thenkhat chu social media lamah auchhuak nghalin, leihnuai tui hralh sum atana state pawn company-in an dil ngam ta mai chu hma lak zui chi nia an ngaih thu an sawi a. A uar zualin sawrkar lai tawng zawnga tawng chhuak an awm bawk.
Agriculture & Farmers’ Welfare minister PC Vanlalruata chuan Patanjali Company dilna hi hralh chhawn leh tur niloin, an inbunna hmuna a tula hman tur chauh a ni tih a sawifiah.
“Patanjali Company hian oil palm herna an bun turah hnathawktute ei in tur leh oil palm rah silfaina tur tui an mamawh avangin Mizoram Ground Water Authority-ah tui verh a dil a. Authority-in public notice a chhuahah ‘hralh chhawn leh turin’ tih an lo tarlang hlauh palh a, an ni pawhin an tihsual thu hi an pha lo a ni,” a ti.
National Mission on Edible Oil Palm hnuaiah Mizoram sawrkarin oil palm herna (processing plant) din turin company pahnih – Godrej Company Ltd leh Ruchi Soya Industries Ltd. chu inremna thuthlung (MoU) a ziahpui a. Godrej Company hian 2014 October 28-ah Bukvanneiah a hawng a. Ruchi Company hi a tlakchhiat avangin Patanjali Foods Ltd-in kum 2019 ah a leisak tih a sawi.
Ruchi Company hi Lawngtlai /Siaha district-ah oil palm herna bun tura tih a ni a, a huna an bun theih tak loh avangin farmer-ten harsatna lian tak an tawh phah a. ZPM sawrkar hnu in Patanjali Company hi ko chhoin kumin January 21 khan MoU a ziahpui a. Tunah hian Liapha Lawngtlai district-ah oil palm herna tur mimal ram, kum 30 chhung hawhsakin an buatsaih mek a. MoU-a ziah a nih danin, Patanjali hian oil palm nursery an siam anga, farmers-ah an pe chhuak ang. Collection Centre siamin oil palm chingtute hnen atangin an lei dawn, tiin minister hian a sawi a ni.
“Mi thenkhatin thu belhchian dawl finfiah hmasa loa, social media kaltlanga an vawrhdarh thin hi a a pawi takzet a. Sawrkar chuan kan farmer-te hmakhua ngaiin oil palm herna bun turin Patanjali a ko lut a, harsatna an tawk a nih pawhin puih hi kan bat a ni,” a ti.