Pathian ram a thleng mek zel – Chief minister

Pathian ram a thleng mek zel
– Chief minister
Mizoramah Pathian ram a thleng mek zel a, thil tha duhtu au aw a awm chuan thil tha ti duh an lo awm mai thin tih chief minister Lalduhoma chuan a sawi.
Ningani – February 20 kha Mizoram State Day a ni a. Sawrkar chuan a hranpa in hemi puala lawmna a siam lo. Sawrkar din Mizoram State Day of Prayer Committee huaihawtin state pum huapin ‘Ram tana Tawngtairual Ni’ atan hman a ni thung a. District headquarters tinah leh khaw hrang hrangah hemi pual hian hun hman a ni a, hmun thenkhatah chuan zingkarah neih niin, thenkhatah chuan chawhma/ chhunah hun hman a ni.
Aizawla hmannaah chief minister Lalduhoma chuan, kum hmasaah ram tan Pathian hnena sual sima tawngtaina – Ninevi Challenge neih a ni tawh a; kuminah Pathian hawisan avanga tawrhna nasa tak an chunga a thleng, inchhira Pathian hnena an inlamlet hnua malsawmna dawng ta – Fiji Challange neih a ni tih a sawi a. Khawvel ram tam zawk chu tluchhe tawh thin, tundin leh an ni deuh vek tih a sawi.
“Fiji ram anga tundin thar leh kan nih theihna tur chuan, beiseina kan nei tur a ni. Thenkhatin a beidawng zawngin kan insawi thaih a, Pathianin min hrem tur angte in an sawi thin. Kan sim loh chuan thim thuah hnih thuah thum pawh a thleng thei a, amaherawh chu a pumpelh theih a ni. Pumpelh turin Pathian kan dil dawn a ni,” a ti.
Pathian ram din duhtute chu Pathianin a hai ngai loa, a pui thin tih Lalduhoma hian a sawi a. Minister, MLA leh sawrkar hnathawk Pathian hmaa tawngtai thin kan mamawh a, chutihrualin ruling emaw ruling lo emaw thliar loin kan MLA zawng zawng leh sawrkar hnathawk tan kan tawngtai tur a ni tih a sawi a ni.
Kan ramah harhna kan chan ngun tawh laiin, siamthatna tak tak thleng turin ram rorelna thleng phak harhna chan a ngai tih a sawi. “Kan crime rate a tlahniam thei lo, lung in tang an tlem phah lo. Kan hlim em em ringawt zel a, kan lam vak vak a, nuam kan ti a, kan nitin nun a khawih lo. Kan ram rorelna sang, Assembly House a khawih phak ngai lo,” a ti. Mizoten ram leh hnam hmangaih kan chawisan hle rualin, Pathian pawm tlaka ram hmangaih erawh a ngai, tiin, “Zoram mamawh hmasa ber chu development a ni lo. He ram hi a lo hausak a, a changkang dawn chuan a ram leh a felna kan zawng hmasa zawk tur a ni,” a ti.
Chumi atana Pathian hmanraw langsar zual – NGO, kohhran leh sawrkar te chu bukin kan awm mek a, kan rawngbawlna thil tha tam tak kan tih chu pawl leh MLA inthlan huna tlin loh kan hlauh vang nge, lar kan duh vang nge, kan hamthatna duh vang tih inenchian a ngai tih a sawi. “Pathian tan, Pathian vang a nih a ngai a, Pathian hmel anmahniah kan hmuh chuan kan dem lo anga, kan fak leh ang,” a ti.
Kan ramah corruption bo vek rih lo mah se, a thawm a dai tan tih chief minister hian a sawi a. Officer tanglai leh pensioner ten an kawl theih aia tam mi leh lirthei an kawlte an dahlet a, official-ten a hun takah an office an thleng a, kan work culture a inthlak mek tih a sawi. Project hnathawh endiktu tur Committee sawrkarin a din a, kan building sak, lei dawh leh kawngpui siam an endik a. khawi emaw laiah ven sen loh erawh an lo awm leh zauh thin tih lohah chuan thil a tha zawngin a kal mek tih a sawi bawk.
Ration card-ah pawh kan sum lakluh dinhmun azirin kan card neih kan thlakthleng mek zel a; kan buk lung a dik chho tan tih pawh sawiin, “Pathian ram a thleng mek zel a ni,” a ti.
Zoram pum tawngtai Ni hi state huap bakah district huapah a huaihawttu Committee din a ni a, khuaah chuan kohhran ho inthurualin hma an la thung.