Paty dang VC an la tam avangin hna thawh a har – K Sapdanga

Paty dang VC an la tam
avangin hna thawh a har
– K Sapdanga
ZPM-in state-ah sawrkarna siam mah se, village council-ah party dang VC an tam zawk avangin hmasawnna hnathawh a harsa tih Home minister K Sapdanga chuan a sawi.
Inrinnia Kawnpui Police Station leh Kawnpui Mualvuma 1st IR Bn Hqrs. bakah Kawnpui, Hortoki, Mualkhang leh Khamrang khua a tlawhnaah Home minister chuan, an party-in sawrkarna chang mah se, village council tam zawkah party dang VC an la tam zawk avangin hmasawnna hnathawh a harsa tih a sawi a. Hei vang hian sawrkar chuan hmasawnna thawh a nih thuai theihnan a rang thei ang bera VC inthlan buatsaih a tum a, nakum February-a inthlang hman turin inbuatsaihna kalpui mek a ni tih a sawi.
“VC-te hi khawtlang tana mi pawimawh ber an ni a, sawrkarin hmasawnna hna a thawh kawngah, central scheme hrang hrang pawh bialtu MLA aia pawimawh zawkna an nei fo. Khawtlang inrelbawlna tel loin ram hian hma a sawn ngawt thei loa, ramin khawtlang a changkan san ngawt thei bawk hek lo. Khawtlang hmasawnna hian ram a tihmasawn mai chauh zawk a ni. Chuvangin state sawrkar nena thawh hona tha nei a, kal dun tur VC tha zawk nei turin kan inbuatsaih a tul takzet,” a ti.
Police lak thar turah online hmanga dilna thehluh theih turin buaipui mek a ni tih Home minister hian sawiin, police indaihlohna phuhru turin police hnaruak 1100 hnawhkhah dilna thehluh a nih laiin, sawrkar sum dinhmun a that loh avangin police 290 lak phaksak an ni tih a sawi a. Online-a police lakna tur advertisement hi tunkar chhoa tihchhuah hman tuma buaipui mek a ni tih a sawi a ni.
“Sawrkarna kan chelh hnuin Home department-ah tan kan la nasa a, kalphung hluia hun rei tak kan lo kal tawh avangin department chhungah pawh siamthat ngai thil tam tak a awm a, kan insiam mek. Rinawm lohna ram leh hnam tan a pawi em em a, mipuiin an tuar bawk thin. Mi fel tak tak karah mi inthlahdahte avangin kan lo hmingthat tawhna pawh thai rehin a awm phah thin. Heng mi inthlahdah, mi rinawm lo te hi sawrkar chuan a thian thianghlim nual tawh a, an chungah thununna kan lek zel dawn a ni,” a ti.
Ram rorelnaa Pathian ram tundin an tum avangin mipui pawhin an nitin nun leh midangten an hmuh phak loh chinah pawh Mizo an nih ang leh Kristian an nih angin rinawmna vawng tlat turin K Sapdanga hian a chah a ni.