Paul Pogba chawl rei dawn

Paul Pogba chawl rei dawn
Hliamin a tihbuai fo Juventus mid-fielder Paul Pogba chu tunhnaia free-kick a pet chhin laia a malpui a tihnat leh tak avangin a lo berah chawlhkar thum a chawl dawn a, France-in Euro 2024 qualifying campaign an tan lai pawhin a la thochhuak hman dawn lo.
Thla 10 lai a chawlh hnuah kumin February ni 18 khan Pogba hian Juve tan inelna a hmachhawn leh chauh a, Torino game-ah harsatna nei lo mah se free-kick a chhuih chhinna lamah a intina leh a, karliamta Europa League lama Freiburg an hneh tum khan inlan lo a, Pathianni Serie A match pakhata 4-2-a Sampdoria an hneh tum khan khelmual a lut thei lo leh bawk.
Pathianni game an khelh zawh hnu lawk khan Juve coach Massimiliano Allegri chuan a midfielder inhliam thu sawiin, “Tuk-in zing khan Pogba hian free-kick a han pet vel a, a malpui tha a tina ta hlauh a, inelna hmachhawn leh thuai thei turin ngaiawh lehna programme a tan nghal,” a ti.
Club thuchhuah pawhin Thawhtannia Pogba hliam endik a nih thu tarlangin, a malpui tha a thler a nih thu an nemnghet.
Juve hian Ningani zan Europa League return leg-ah Freiburg an tum leh dawn a, karliamta Nilaini khan Pogba hi team inhmuhkhawmna lama a tlai avangin khami ni match day squad atangin paih a ni a, kartawpah a inhliam zui leh ta a ni.
Nikum nipui thawt laia Manchester United chhuahsana Turin khaw team a zawm hnuah Pogba hian a club thar tan vawihnih chiah la khelin, chu pawh bench atanga lut ve vein a ni a, a hmasa zawk chu February ni 28 kha a ni.
Chumi hmaa United tana a inlan hnuhnun chu April 2022 daih tawha sili faia mualneitu Liverpool an hneh loh tum kha niin, kha match-ah khan a chawn tha a tina a, season liamta la bang zawngah a inlan thei ta lo a nih kha.
2018 World Cup winner hian pre-season inbuatsaih lai khan a khup tina lehin, nikum World Cup kha a khelh theih loh a hlauh luatah inzaina chemte hmachhawn loh mai a thlang zet a, mahse, zai loh theih loh dinhmunah a ding zui ta tho a; January thlaah Juve squad-ah kirlehin, tha na avangin khelmuala a kir hun a khawtlai leh!
France hian Pogba tel loin Euro 2024 qualifying campaign bul an tan dawn a, March ni 24, Zirtawpni khian an Group B fixture-ah Netherlands chu an khelmual pui ber Stade de France-ah an mikhual ang a, nithum hnuah World Cup runners-up hian Republic of Ireland an luhkhung zui leh ang.
Iinternational break zawha Juve game hmasaber chu April ni 1 Serie A match-a Hellas Verona an mikhual tur hi a ni.