Pawikhawihna lamah naupangkaihhnawih leh tel ve na a tam

Kum kalta chhung leh kum kal mekah pawikhawihna lamah naupang tawrhna emaw a pawikhawihtu zingah naupang an tel ve na a tam a, kut tuar leh venhim ngai an nihna a tam hle tih sawi a ni.

State Child Welfare and Protection Committee chu an chairman, Social Welfare, Women and Child Development commissioner & secretary Lalzarmawii kaihhruaiin Thawhtanni khan thutkhawm a ni a. Heta tarlan danin, 2024- 2025 chhung khan naupang venhim leh enkawl ngai bikah Child Welfare Committee (CWC) ah thubuai ziahluh ngaituah tura chhawp chhuah case 1651 zingah case 1573 chinfel a ni tawh a, la chinfel loh 78 a awm. Juvenile Justice Board (JJB) hnuaia thubuai ziahluh case 305-ah case 219 chinfel tawh niin, chinfel loh 86 a awm mek.
Tun dinhmunah Mizorama district 11-ah sawrkar hriatpui Children Home/ Observation cum Special Home ah naupang enkawl 991 an awm a, naupang 8 chu hmun him bik (safety place) ah enkawl an ni. Naupang chunga hleilenna leh hursualna avanga POCSO case ziahluh kum 2024 leh 2025 inkarah case 480 awmin, Aizawlah case ziahluh a tam ber a, 152 a ni. Siaha district-ah case ziahluh tlem berin 9 ziahluh a ni.
POCSO case ziahluhah hian a tuartu ah hmeichhia an tam zawk a, case 480 zinga 444 hi a ni.
Naupang chunga hleilenna leh harsatna tawk avanga Childline leh W&CD Control Room hnena harsatna thlen hi, kumin April atang June inkar khan mi 1512 an awm a, heng zinga 430-ah hian thubuai ziahluh a ni.
Thutkhawmah hian Mission Vatsalaya leh Juvenile Justice Fund chungchang ngaihtuahho a ni a. Kum 2012 atanga kumin June thleng khan Social Welfare, W&CD kaltlanga naupang tanpuina sumfaia pek mi 7771 an awm a; 2025- 2026 atan naupang tanpuina pek tura ruahman mi 3511 an awm. Tanpuina hi thlatin Rs. 4000 an dawng thin a ni.
Mission Vatsalaya hnuaiah 2025- 2026 sawrkar kum chhunga sawrkar laipui atangin State Child Protection Society, Districts Child Protection Units District 11 leh State Adoption Resource Agency hman turin sum dawn tura ruahman chu Rs. 7,80,56,613 niin, state sawrkarin Rs. 86,72,957 in a dolet ve dawn a ni.
Hmanpuitu Social Welfare, Women & Child Development minister Lalrinpuii chuan SCW&PC naupang humsual dai leh vanduaina tawk tanpuitute hnathawh chu ropui a tih thu a sawi a. Naupang venhim leh an thanlen chhoh zelna tura enkawl lah kaihhruai hna thawktute chu an mawhphurhna a pawimawh hle tih hrereng turin a chah.